రూ.12 వేల లంచం తీసుకుంటూ ఏసీబీకి చిక్కిన ఫారెస్ట్ సెక్షన్ ఆఫీసర్!
టింబర్ డిపో లైసెన్స్‌ రెన్యువల్‌ కోసం లంచం డిమాండ్‌.. రెడ్‌హ్యాండెడ్‌గా పట్టుకున్న ఏసీబీ అధికారులు
హైదరాబాద్, అక్టోబర్ 9, 2026 | నిజం న్యూస్:
నిర్మల్‌ జిల్లా ఖానాపూర్‌ రేంజ్‌ అండ్‌ డివిజన్‌లో విధులు నిర్వహిస్తున్న ఫారెస్ట్ సెక్షన్ ఆఫీసర్ ఐండ్ల రవీందర్‌ రూ.12 వేల లంచం తీసుకుంటూ ఏసీబీ అధికారులకు పట్టుబడ్డారు. అక్టోబర్ 8న ఈ ఘటన చోటుచేసుకుంది.
టింబర్ డిపో లైసెన్స్‌ రెన్యువల్‌ కోసం లంచం
ఫిర్యాదుదారునికి చెందిన టింబర్ డిపో లైసెన్స్‌ రెన్యువల్‌ ప్రక్రియలో భాగంగా తనిఖీ నివేదికను ఉన్నతాధికారులకు పంపించేందుకు ఫారెస్ట్ సెక్షన్ ఆఫీసర్ రూ.12,000 లంచం డిమాండ్‌ చేసి స్వీకరించినట్లు ఏసీబీ అధికారులు వెల్లడించారు. దీంతో ఆదిలాబాద్‌ రేంజ్‌ ఏసీబీ అధికారులు వలపన్ని, లంచం తీసుకుంటున్న సమయంలో ఆయనను రెడ్‌హ్యాండెడ్‌గా పట్టుకున్నారు.
లంచం సొమ్ము స్వాధీనం
నిందితుడి వద్ద నుంచి రూ.12,000 లంచం సొమ్మును అధికారులు స్వాధీనం చేసుకున్నారు. అధికార దుర్వినియోగానికి పాల్పడి అనుచిత ప్రయోజనం పొందేందుకు ప్రయత్నించినట్లు ఏసీబీ పేర్కొంది.
అనంతరం నిందితుడిని అరెస్టు చేసి కరీంనగర్‌లోని ఎస్‌పీఈ, ఏసీబీ కేసుల ప్రత్యేక న్యాయస్థానం ఎదుట హాజరుపరిచినట్లు అధికారులు తెలిపారు. కేసుకు సంబంధించి తదుపరి చట్టపరమైన చర్యలు కొనసాగుతున్నాయని, ప్రస్తుతం దర్యాప్తు జరుగుతోందని వెల్లడించారు. భద్రతా కారణాల దృష్ట్యా ఫిర్యాదుదారుని వివరాలను గోప్యంగా ఉంచినట్లు స్పష్టం చేశారు.
లంచం అడిగితే 1064కు ఫిర్యాదు చేయండి
ప్రభుత్వ ఉద్యోగులు ఎవరైనా లంచం డిమాండ్‌ చేస్తే ప్రజలు ఏసీబీ టోల్‌ ఫ్రీ నంబర్‌ 1064కు ఫిర్యాదు చేయాలని అధికారులు సూచించారు. వాట్సాప్‌ నంబర్‌ 9440446106 ద్వారా కూడా ఫిర్యాదు చేయవచ్చని తెలిపారు. ఫిర్యాదుదారుల వివరాలను గోప్యంగా ఉంచుతామని పేర్కొన్నారు.
శ్రీనివాస్ నాయక్ | స్టేట్ బ్యూరో | నిజం న్యూస్
