కీసర డిప్యూటీ తహసీల్దార్ సందీప్ కుమార్ రెడ్డి, వీఆర్వో విజయ్ కుమార్ రెడ్డిపై ఏసీబీ కేసు..

హైదరాబాద్, అక్టోబర్ 15, 2026 | నిజం న్యూస్

మేడ్చల్‌-మల్కాజిగిరి జిల్లా కీసర మండలంలో లంచం వ్యవహారంపై అవినీతి నిరోధక శాఖ (ఏసీబీ) అధికారులు చర్యలు చేపట్టారు. వ్యవసాయ భూములకు సంబంధించిన పనులు పూర్తి చేసేందుకు రూ.5 లక్షలు లంచం డిమాండ్ చేసిన కేసులో డిప్యూటీ తహసీల్దార్, గ్రామ రెవెన్యూ అధికారి (వీఆర్వో), ఓ ప్రైవేట్ వ్యక్తి ఏసీబీ కేసులో చిక్కుకున్నారు.

ఏసీబీ విడుదల చేసిన వివరాల ప్రకారం.. కీసర తహసీల్దార్ కార్యాలయంలో డిప్యూటీ తహసీల్దార్‌గా పనిచేస్తున్న అమనగంటి సందీప్ కుమార్ రెడ్డి (ఏ-1) ఫిర్యాదుదారుడి తల్లి, కుటుంబ సభ్యుల పేర్లపై ఉన్న వ్యవసాయ భూములను రిజిస్ట్రేషన్ చట్టం సెక్షన్ 22-ఏ కింద నిషేధిత జాబితా నుంచి తొలగించే ప్రక్రియను పూర్తి చేసేందుకు రూ.5 లక్షల లంచం డిమాండ్ చేసినట్లు అధికారులు తెలిపారు.

ఈ వ్యవహారంలో ప్రైవేట్ వ్యక్తి కావలి బాలకృష్ణ (ఏ-2) ద్వారా లంచం తీసుకునేలా వ్యవహరించినట్లు ఏసీబీ పేర్కొంది. కీసర మండల గ్రామ రెవెన్యూ అధికారి నన్నూరి విజయ్ కుమార్ రెడ్డి (ఏ-3) సూచనల మేరకు బాలకృష్ణ లంచం మొత్తాన్ని స్వీకరించినట్లు వెల్లడించింది.

డిమాండ్ చేసిన రూ.5 లక్షల్లో భాగంగా రూ.2.50 లక్షలు ఫిర్యాదుదారుడి నుంచి స్వీకరిస్తుండగా రంగారెడ్డి రేంజ్ ఏసీబీ అధికారులు బాలకృష్ణను పట్టుకున్నారు. ఆయన వద్ద నుంచి లంచం సొమ్మును స్వాధీనం చేసుకున్నట్లు ఏసీబీ తెలిపింది.

ఈ కేసులో డిప్యూటీ తహసీల్దార్ అమనగంటి సందీప్ కుమార్ రెడ్డి, ప్రైవేట్ వ్యక్తి కావలి బాలకృష్ణ, వీఆర్వో నన్నూరి విజయ్ కుమార్ రెడ్డిలను నాంపల్లిలోని ఎస్‌పీఈ, ఏసీబీ కేసుల ప్రత్యేక న్యాయస్థానం ఎదుట హాజరుపరిచి న్యాయ రిమాండ్‌కు తరలించేందుకు చర్యలు తీసుకున్నట్లు అధికారులు వెల్లడించారు. కేసు ప్రస్తుతం దర్యాప్తులో ఉంది.

ప్రభుత్వ ఉద్యోగులు ఎవరైనా లంచం డిమాండ్ చేస్తే ప్రజలు ఏసీబీ టోల్‌ఫ్రీ నంబర్ 1064కు ఫిర్యాదు చేయాలని అధికారులు సూచించారు. వాట్సాప్ ద్వారా 9440446106 నంబర్‌కు కూడా సమాచారం అందించవచ్చని తెలిపారు. ఫిర్యాదుదారుల వివరాలను గోప్యంగా ఉంచుతామని ఏసీబీ పేర్కొంది.

శ్రీనివాస్ నాయక్

స్టేట్ బ్యూరో, నిజం న్యూస్