సర్వే నివేదిక కోసం రూ.35 వేల లంచం.. ఏసీబీ వలలో డిప్యూటీ ఇన్‌స్పెక్టర్

నల్గొండ, జూన్ 20 (నిజం న్యూస్):

అవినీతికి పాల్పడిన మరో ప్రభుత్వ అధికారి ఏసీబీ వలలో చిక్కాడు. నల్గొండ జిల్లా రెవెన్యూ డివిజనల్ అధికారి (ఆర్డీఓ) కార్యాలయంలో డిప్యూటీ ఇన్‌స్పెక్టర్ ఆఫ్ సర్వే అండ్ ల్యాండ్ రికార్డ్స్‌గా విధులు నిర్వహిస్తున్న జి. పవన్ కుమార్‌ను లంచం తీసుకుంటూ తెలంగాణ అవినీతి నిరోధక శాఖ (ఏసీబీ) అధికారులు నిన్న (శుక్రవారం) రెడ్ హ్యాండెడ్‌గా పట్టుకున్నారు.

ఏసీబీ విడుదల చేసిన వివరాల ప్రకారం, ఫిర్యాదుదారుడి తల్లి, అత్తకు సంబంధించిన భూముల సర్వే నివేదిక జారీ చేయడానికి పవన్ కుమార్ రూ.35 వేల లంచం డిమాండ్ చేశాడు. ఇందులో భాగంగా గతంలోనే రూ.20 వేల అడ్వాన్స్ లంచాన్ని స్వీకరించినట్లు అధికారులు గుర్తించారు. మిగిలిన రూ.15 వేల లంచాన్ని స్వీకరిస్తుండగా నిన్న శుక్రవారం నల్గొండ కలెక్టరేట్ సమీపంలో ఏసీబీ అధికారులు అతడిని పట్టుకున్నారు.

అధికారిని తనిఖీ చేయగా అతని వద్ద నుంచి రూ.15 వేల లంచం నగదును స్వాధీనం చేసుకున్నారు. విధులను నిజాయితీగా నిర్వహించాల్సిన అధికారి వ్యక్తిగత ప్రయోజనం కోసం అక్రమంగా లంచం తీసుకోవడం ద్వారా అవినీతి నిరోధక చట్టాలను ఉల్లంఘించినట్లు ఏసీబీ పేర్కొంది.

నిందితుడిని అరెస్ట్ చేసి నాంపల్లి ప్రత్యేక ఏసీబీ కోర్టులో హాజరుపరచనున్నట్లు అధికారులు వెల్లడించారు. ప్రస్తుతం కేసు దర్యాప్తు కొనసాగుతోందని, ఫిర్యాదుదారుడి వివరాలను భద్రతా కారణాల రీత్యా గోప్యంగా ఉంచినట్లు తెలిపారు.

ప్రభుత్వ ఉద్యోగులు ఎవరైనా లంచం డిమాండ్ చేసినా ప్రజలు వెంటనే ఏసీబీ టోల్ ఫ్రీ నంబర్ 1064కు ఫిర్యాదు చేయాలని అధికారులు సూచించారు. ఫిర్యాదుదారుల వివరాలు పూర్తిగా గోప్యంగా ఉంచబడతాయని ఏసీబీ స్పష్టం చేసింది.

— శ్రీనివాస్ నాయక్, స్టేట్ బ్యూరో, నిజం న్యూస్