జాతీయ పోలీస్ అకాడమీలో లైంగిక వేధింపుల కలకలం..!

నిజం న్యూస్, హైదరాబాద్ | జూలై 19:

దేశంలో అత్యంత ప్రతిష్ఠాత్మకమైన పోలీసు శిక్షణా సంస్థల్లో ఒకటైన సర్దార్ వల్లభ్‌భాయ్ పటేల్ జాతీయ పోలీస్ అకాడమీ (SVPNPA), హైదరాబాద్లో లైంగిక వేధింపుల ఆరోపణలు కలకలం రేపాయి.

అకాడమీలో శిక్షణ పొందుతున్న ఓ మహిళా ట్రైనీ ఐపీఎస్ అధికారి తనను ట్రైనీ ఐపీఎస్ అధికారి ఉదయ్ కృష్ణారెడ్డి లైంగికంగా, మానసికంగా వేధిస్తున్నాడంటూ అత్తాపూర్ పోలీస్ స్టేషన్‌లో ఫిర్యాదు చేసింది.

బాధితురాలి ఫిర్యాదు ప్రకారం, ఉదయ్ కృష్ణారెడ్డి తనకు అసభ్యకరమైన మెసేజ్‌లు పంపడంతో పాటు, ఫోన్‌లో అభ్యంతరకరంగా మాట్లాడి, బూతులు తిడుతూ వేధింపులకు పాల్పడ్డాడని పేర్కొంది. అంతేకాకుండా, ఈ నెల 9వ తేదీన తనను బలవంతంగా ఓ గదిలోకి లాక్కెళ్లి మెడపై కత్తి పెట్టి బెదిరించాడని, తన అనుమతి లేకుండా వ్యక్తిగత (ప్రైవేట్) వీడియోలు చిత్రీకరించాడని ఆరోపించింది.

ఆ వీడియోలను ఆధారంగా చేసుకుని తనను బెదిరింపులకు గురిచేశాడని, అనంతరం తన సెల్‌ఫోన్‌ను తీసుకుని అందులోని వీడియోలను తన భర్తకు వాట్సాప్ ద్వారా పంపించాడని కూడా ఫిర్యాదులో పేర్కొంది. ఈ ఘటనల కారణంగా తాను తీవ్ర మానసిక వేదనకు గురయ్యానని, ప్రాణభయంతోనే పోలీసులను ఆశ్రయించినట్లు బాధితురాలు తెలిపింది.

ఫిర్యాదును స్వీకరించిన అత్తాపూర్ పోలీసులు కేసు నమోదు చేసి దర్యాప్తు ప్రారంభించారు. బాధితురాలు సమర్పించిన మొబైల్ ఫోన్, వాట్సాప్ చాట్‌లు, కాల్ వివరాలు, ఇతర డిజిటల్ ఆధారాలను పోలీసులు స్వాధీనం చేసుకుని పరిశీలిస్తున్నారు. నిందితుడి మొబైల్ ఫోన్‌ను కూడా స్వాధీనం చేసుకుని ఫోరెన్సిక్ పరీక్షలకు పంపే అవకాశమున్నట్లు సమాచారం.

ఈ ఘటనపై జాతీయ పోలీస్ అకాడమీ యాజమాన్యానికి కూడా సమాచారం అందింది. ఘటన తీవ్రత దృష్ట్యా అకాడమీ స్థాయిలో అంతర్గత విచారణ చేపట్టే అవకాశమున్నట్లు తెలుస్తోంది. దేశానికి పోలీసు నాయకత్వాన్ని తీర్చిదిద్దే ప్రతిష్ఠాత్మక శిక్షణా సంస్థలో ఇలాంటి ఆరోపణలు రావడం పోలీసు వర్గాల్లో తీవ్ర చర్చకు దారితీసింది.

బాధితురాలి ఫిర్యాదు ఆధారంగా మహిళపై వేధింపులు, బెదిరింపులు, వ్యక్తిగత గోప్యతకు భంగం కలిగించడం, ఎలక్ట్రానిక్ మాధ్యమాల ద్వారా జరిగిన నేరాలకు సంబంధించిన చట్టపరమైన నిబంధనల కింద పోలీసులు కేసు నమోదు చేసి అన్ని కోణాల్లో దర్యాప్తు కొనసాగిస్తున్నారు.

గమనిక: ఈ కథనంలో పేర్కొన్న అంశాలు బాధితురాలు పోలీసులకు ఇచ్చిన ఫిర్యాదులో చేసిన ఆరోపణల ఆధారంగా మాత్రమే ఉన్నాయి. ఈ ఆరోపణలపై పోలీసులు దర్యాప్తు చేస్తున్నారు. కోర్టు లేదా దర్యాప్తు సంస్థలు నిర్ధారించే వరకు ఇవి ఆరోపణలుగానే పరిగణించాలి.

— శ్రీనివాస్ నాయక్

స్టేట్ బ్యూరో, నిజం న్యూస్