రూ.14 వేల లంచం తీసుకుంటూ ఏసీబీకి చిక్కిన తహసీల్దార్

ములుగు | నిజం న్యూస్ | సెప్టెంబర్ 18, 2026

ములుగు జిల్లా గోవిందరావుపేట మండల తహసీల్దార్‌ నెల్లుట్ల సృజన్‌కుమార్‌ రూ.14 వేల లంచం తీసుకుంటుండగా అవినీతి నిరోధక శాఖ (ఏసీబీ) వరంగల్‌ రేంజ్‌ అధికారులు రెడ్‌హ్యాండెడ్‌గా పట్టుకున్నారు. పూర్వీకుల వ్యవసాయ భూమికి సంబంధించిన వారసత్వ మార్పిడి ప్రక్రియలో ఫిర్యాదుదారు భార్య లింగాల శ్రీలత పేరుపై అధికారికంగా చర్యలు చేపట్టేందుకు లంచం డిమాండ్‌ చేసినట్లు ఏసీబీ తెలిపింది.

ఏసీబీ తెలిపిన వివరాల ప్రకారం.. తహసీల్దార్‌ తొలుత రూ.15 వేలు డిమాండ్‌ చేయగా, బేరసారాల అనంతరం రూ.14 వేలకు తగ్గించినట్లు పేర్కొంది. ఫిర్యాదు అందడంతో ఏసీబీ అధికారులు పథకం ప్రకారం గోవిందరావుపేట మండల రెవెన్యూ కార్యాలయంలో ట్రాప్‌ నిర్వహించారు.

ట్రాప్‌ సమయంలో రూ.14 వేల లంచం నగదును తహసీల్దార్‌ తన కుడి చేతితో తీసుకుని కుడివైపు ప్యాంట్‌ జేబులో పెట్టుకున్నట్లు ఏసీబీ వెల్లడించింది. అనంతరం ఆ నగదును స్వాధీనం చేసుకుని, ఆయన చేతి వేళ్లపై రసాయన పరీక్ష నిర్వహించగా పాజిటివ్‌ ఫలితం వచ్చినట్లు తెలిపింది.

ఏసీబీ అధికారులు తహసీల్దార్‌ను అదుపులోకి తీసుకుని, వరంగల్‌లోని ఎస్‌పీఈ అండ్‌ ఏసీబీ కేసుల ప్రత్యేక న్యాయస్థానం ముందు హాజరుపరిచేందుకు చర్యలు చేపట్టారు. ఈ ఘటనపై కేసు దర్యాప్తు కొనసాగుతోంది. ఫిర్యాదుదారుడి భద్రత దృష్ట్యా ఆయన వివరాలను ఏసీబీ వెల్లడించలేదు.

లంచం డిమాండ్‌ చేసే ప్రభుత్వ ఉద్యోగులపై ఫిర్యాదు చేసేందుకు ఏసీబీ టోల్‌ఫ్రీ నంబర్‌ 1064ను సంప్రదించవచ్చని అధికారులు సూచించారు.

శ్రీనివాస్ నాయక్

స్టేట్ బ్యూరో,నిజం న్యూస్