రూ.3 లక్షల లంచం తీసుకుంటూ ఏసీబీకి చిక్కిన మిర్చౌక్ ఇన్‌స్పెక్టర్, హోంగార్డు!
రూ.6 లక్షలు డిమాండ్.. రూ.3 లక్షలు స్వీకరిస్తుండగా పట్టివేత
హైదరాబాద్, అక్టోబర్ 28 | నిజం న్యూస్
హైదరాబాద్‌లోని మిర్చౌక్ పోలీస్‌ స్టేషన్‌కు చెందిన ఇన్‌స్పెక్టర్, హోంగార్డు అవినీతి నిరోధక శాఖ (ఏసీబీ) వలకు చిక్కారు. ఒక కేసులో అనుకూలంగా వ్యవహరించేందుకు రూ.6 లక్షలు లంచం డిమాండ్ చేసి, అందులో భాగంగా రూ.3 లక్షలు స్వీకరిస్తుండగా ఏసీబీ అధికారులు వారిని పట్టుకున్నారు. ఈ ఘటన అక్టోబర్ 27, మంగళవారం చోటుచేసుకుంది.
ఏసీబీ తెలిపిన వివరాల ప్రకారం.. మిర్చౌక్ పోలీస్‌ స్టేషన్‌లో ఇన్‌స్పెక్టర్‌గా పనిచేస్తున్న ఎం. కొండల్‌రావు (ఏవో-1), అదే స్టేషన్‌లో హోంగార్డుగా పనిచేస్తున్న అబిద్ అలీ (ఏవో-2) ద్వారా ఫిర్యాదుదారుడి నుంచి లంచం స్వీకరించినట్లు గుర్తించారు. ఫిర్యాదుదారుడి తండ్రిపై నమోదైన కేసును మూసివేయడం, బలవంతపు చర్యలు తీసుకోకుండా చూడటం, భవిష్యత్తులో సహకారం అందించడం వంటి అధికారిక ప్రయోజనాల కోసం ఈ మొత్తాన్ని డిమాండ్ చేసినట్లు ఏసీబీ వెల్లడించింది.
లంచం మొత్తంలో భాగంగా రూ.3 లక్షలు హోంగార్డు అబిద్ అలీ వద్ద ఉండగా ఏసీబీ అధికారులు స్వాధీనం చేసుకున్నారు. విధులను సక్రమంగా నిర్వర్తించకుండా, అక్రమ ప్రయోజనం పొందేందుకు ప్రయత్నించినట్లు ప్రాథమికంగా గుర్తించారు.
ఈ కేసులో ఇన్‌స్పెక్టర్ ఎం. కొండల్‌రావు, హోంగార్డు అబిద్ అలీలను అరెస్టు చేసి, నాంపల్లిలోని అవినీతి నిరోధక శాఖ కేసుల ప్రత్యేక న్యాయస్థానం ముందు హాజరుపరిచి, న్యాయ రిమాండ్‌కు తరలించనున్నట్లు ఏసీబీ పేర్కొంది. కేసు ప్రస్తుతం దర్యాప్తులో ఉంది. ఫిర్యాదుదారుడి భద్రత దృష్ట్యా ఆయన వివరాలను గోప్యంగా ఉంచినట్లు తెలిపింది.
లంచం అడిగితే ఏసీబీకి ఫిర్యాదు చేయండి
ప్రభుత్వ ఉద్యోగులు ఎవరైనా లంచం డిమాండ్ చేస్తే ప్రజలు భయపడకుండా ఏసీబీ టోల్‌ఫ్రీ నంబర్ 1064కు ఫిర్యాదు చేయవచ్చు. వాట్సాప్ నంబర్ 9440446106 ద్వారా కూడా సమాచారం అందించవచ్చు. ఫిర్యాదుదారుల వివరాలను గోప్యంగా ఉంచుతామని ఏసీబీ తెలిపింది.
-శ్రీనివాస్ నాయక్
స్టేట్ బ్యూరో,నిజం న్యూస్
