భర్తను హత్య చేసి మృతదేహాన్ని ముక్కలు చేసి పాతిపెట్టి.. “ఆస్ట్రేలియాలో ఉద్యోగం చేస్తున్నాడు” అంటూ రెండేళ్లు నాటకం

– గుజరాత్‌లో సంచలనం

జామ్‌నగర్, నిజం న్యూస్, జూలై 30:

గుజరాత్‌లోని జామ్‌నగర్‌లో రెండేళ్ల క్రితం జరిగిన దారుణ హత్య కేసు తాజాగా వెలుగులోకి రావడంతో రాష్ట్రవ్యాప్తంగా సంచలనం రేగింది. భర్తను హత్య చేసి మృతదేహాన్ని ముక్కలు చేసి పాతిపెట్టి, అతడు ఆస్ట్రేలియాలో ఉద్యోగం చేస్తున్నాడంటూ రెండేళ్ల పాటు కుటుంబ సభ్యులను నమ్మించిన భార్య, ఆమె ప్రియుడిని పోలీసులు అరెస్ట్ చేశారు. ఈ కేసు వివరాలు బయటకు రావడంతో అందరూ షాక్‌కు గురయ్యారు.

పోలీసుల వివరాల ప్రకారం, జామ్‌నగర్‌కు చెందిన జిగ్నేశ్ మావడియాకు పృథ్వీతో వివాహమైంది. అయితే పెళ్లికి ముందే పృథ్వీకి నిలేష్ అనే వ్యక్తితో ప్రేమ సంబంధం ఉండేది.

వివాహం అనంతరం కూడా ఇద్దరూ రహస్యంగా తమ సంబంధాన్ని కొనసాగించినట్లు దర్యాప్తులో వెల్లడైంది. తమ సంబంధానికి జిగ్నేశ్ అడ్డుగా ఉన్నాడని భావించిన ఇద్దరూ అతడిని హత్య చేయాలని పథకం రచించారు.

దాదాపు రెండేళ్ల క్రితం (2024లో) జిగ్నేశ్‌కు మద్యంలో సైనైడ్ కలిపి తాగించి హత్య చేసినట్లు పోలీసులు తెలిపారు. అనంతరం మృతదేహాన్ని జామ్‌నగర్ జీఐడీసీ ప్రాంతంలోని ఓ ఫ్యాక్టరీకి తీసుకెళ్లి ముక్కలుగా నరికి, అక్కడ సుమారు 12 అడుగుల లోతులో పాతిపెట్టి, పైన కాంక్రీట్ వేసి ఆనవాళ్లు లేకుండా చేసినట్లు విచారణలో వెల్లడైంది.

హత్య అనంతరం ఎవరికి అనుమానం రాకుండా ఉండేందుకు జిగ్నేశ్‌కు ఆస్ట్రేలియాలో మంచి ఉద్యోగం వచ్చిందని, అక్కడే స్థిరపడ్డాడని పృథ్వీ తన కుటుంబ సభ్యులు, బంధువులను నమ్మించింది. కొన్నిసార్లు అతనితో మాట్లాడే అవకాశం లేదని కూడా వివిధ కారణాలు చెబుతూ అందరినీ మభ్యపెట్టింది.

అయితే ఇటీవల ఆస్ట్రేలియాకు వెళ్లే ఓ బంధువు జిగ్నేశ్ సంప్రదింపు వివరాలు కోరడంతో అనుమానం మొదలైంది. దీంతో జిగ్నేశ్ సోదరుడు అశోక్ స్వయంగా విచారణ చేపట్టగా, ఆస్ట్రేలియాలో జిగ్నేశ్ పేరుతో ఎలాంటి ఉద్యోగం లేదా ప్రయాణ రికార్డులు లేవని గుర్తించాడు. అనంతరం పోలీసులకు ఫిర్యాదు చేయడంతో కేసు మళ్లీ దర్యాప్తులోకి వెళ్లింది.

పోలీసులు పృథ్వీ, నిలేష్‌లను అదుపులోకి తీసుకుని విచారించగా వారు నేరాన్ని అంగీకరించినట్లు సమాచారం. వారి సూచన మేరకు ఫ్యాక్టరీ ప్రాంగణంలో తవ్వకాలు చేపట్టి మృతదేహ అవశేషాలను స్వాధీనం చేసుకున్నారు. అనంతరం వాటిని ఫోరెన్సిక్ పరీక్షల కోసం పంపించారు. ఇద్దరిపై హత్య, ఆధారాల నాశనం, కుట్ర తదితర నేరాల కింద కేసులు నమోదు చేసి దర్యాప్తు కొనసాగిస్తున్నారు.

— శ్రీనివాస్ నాయక్

స్టేట్ బ్యూరో, నిజం న్యూస్