గ్రామీణ తెలంగాణకు హైస్పీడ్ ఇంటర్నెట్ దిశగా కీలక అడుగు
భారత్నెట్ అమలుపై కేంద్రంతో సీఎం రేవంత్ కీలక చర్చలు..
3,089 గ్రామాల్లో డిజిటల్ అనుసంధాన పునరుద్ధరణకు చర్యలు
నిజం న్యూస్ | మే 28, 2026
గ్రామీణ తెలంగాణలో నిరంతర హైస్పీడ్ బ్రాడ్బ్యాండ్ ఇంటర్నెట్ సౌకర్యం కల్పించేందుకు అమెండెడ్ భారత్నెట్ ప్రోగ్రామ్ (ఏబీపీ) అమలుపై తెలంగాణ ప్రభుత్వం కీలక చర్యలు ప్రారంభించింది. ఈ నేపథ్యంలో నిన్న ముఖ్యమంత్రి రేవంత్ రెడ్డి కేంద్ర సమాచార, కమ్యూనికేషన్స్ శాఖ మంత్రి జ్యోతిరాదిత్య సింధియాతో వీడియో సమావేశం ద్వారా విస్తృతంగా చర్చించారు.
ఈ సమావేశంలో అమెండెడ్ భారత్నెట్ ప్రోగ్రామ్కు సంబంధించి కేంద్రంతో ఒప్పందాన్ని వీలైనంత త్వరగా కుదుర్చుకోవడం, పెండింగ్లో ఉన్న నిధులను తక్షణమే విడుదల చేయడం వంటి అంశాలను ముఖ్యమంత్రి ప్రాధాన్యంగా ప్రస్తావించినట్లు సమాచారం. గ్రామీణ ప్రాంతాల్లో ఇంటర్నెట్ సేవలను మరింత బలోపేతం చేయడానికి కేంద్రం పూర్తి సహకారం అందించాలని ఆయన కోరారు.
టీ-ఫైబర్ ప్రాజెక్టు అమలుపై కూడా ప్రత్యేకంగా చర్చ జరిగింది. ఈ వీడియో సమావేశంలో రాష్ట్ర సమాచార సాంకేతిక, పరిశ్రమల శాఖ మంత్రి శ్రీధర్ బాబు పాల్గొని రాష్ట్ర ప్రణాళికలను వివరించారు.
మండల కేంద్రాల నుంచి గ్రామ పంచాయతీల వరకు వలయాకార నెట్వర్క్ వ్యవస్థలను డిజిటల్ భారత్ నిధికి బదిలీ చేయడంపై స్పష్టమైన విధానం ఉండాలని తెలంగాణ ప్రభుత్వం కేంద్రాన్ని కోరింది. దీనిపై కేంద్ర మంత్రి సానుకూలంగా స్పందిస్తూ, రాష్ట్రానికి అన్ని విధాలా సహకారం అందిస్తామని హామీ ఇచ్చినట్లు తెలిసింది.
ప్రతి గ్రామానికి, ప్రతి ఇంటికి నాణ్యమైన హైస్పీడ్ ఇంటర్నెట్ సేవలు అందించాలనే లక్ష్యంతో తెలంగాణ ప్రభుత్వం ముందుకు సాగుతోంది. రాష్ట్రంలో టీ-ఫైబర్ నెట్వర్క్ను విస్తరిస్తూ ప్రతి గ్రామ పంచాయతీని వలయాకార నిర్మాణ పద్ధతి ద్వారా అనుసంధానించేందుకు ప్రణాళికలు సిద్ధం చేస్తున్నట్లు అధికారులు తెలిపారు. ఈ విధానం వల్ల ఒక మార్గంలో నెట్వర్క్ అంతరాయం ఏర్పడినా, ప్రత్యామ్నాయ మార్గం ద్వారా సేవలు నిరంతరం కొనసాగనున్నాయి.
మొదటి దశలో నెట్వర్క్ దెబ్బతిన్న ఉమ్మడి నిజామాబాద్, రంగారెడ్డి, ఖమ్మం జిల్లాల్లోని 3,089 గ్రామాలకు డిజిటల్ అనుసంధాన పునరుద్ధరణ చేపట్టనున్నట్లు ప్రభుత్వం వెల్లడించింది. భవిష్యత్తు అవసరాలకు అనుగుణంగా ఫైబర్ నెట్వర్క్ మౌలిక సదుపాయాలను బలోపేతం చేసి గ్రామీణ ప్రాంతాలకు మెరుగైన ఇంటర్నెట్ సేవలు అందించాలనే లక్ష్యంతో ప్రభుత్వం ముందుకు సాగుతోంది.
ఈ వీడియో సమావేశంలో ప్రభుత్వ ప్రధాన కార్యదర్శి రామకృష్ణారావు, ముఖ్యమంత్రి ప్రత్యేక కార్యదర్శి అజిత్ రెడ్డి, సమాచార సాంకేతిక శాఖ సంయుక్త కార్యదర్శి అనుదీప్ తదితర ఉన్నతాధికారులు పాల్గొన్నారు.
