భర్తను హత్య చేసి ప్రమాదంగా చిత్రీకరణ.. ప్రియుడితో కలిసి నవవధువు కిరాతకం!

జూలై 8, 2026 | నిజం న్యూస్

గురుగ్రామ్ (హర్యానా): పెళ్లయి ఇంకా కొన్ని రోజులు కూడా కాకముందే, వివాహేతర సంబంధానికి అడ్డుగా ఉన్నాడనే కారణంతో ఓ నవవధువు తన ప్రియుడితో కలిసి భర్తను దారుణంగా హత్య చేయించిన ఘటన హర్యానాలో ఆలస్యంగా వెలుగులోకి వచ్చింది. తొలుత దీనిని ప్రమాదవశాత్తు జరిగిన మరణంగా భావించిన పోలీసులు, డిలీట్ చేసిన కాల్స్, చాట్స్‌ను రికవరీ చేయడంతో అసలు నిజాలు వెలుగుచూశాయి.

వివాహేతర సంబంధమే హత్యకు కారణం

జర్తాల్ గ్రామానికి చెందిన 21 ఏళ్ల మోను అనే యువకుడు స్థానికంగా చిన్నచిన్న పనులు చేస్తూ, ఇటీవల జలియావాస్‌లో ఓ షాపును ప్రారంభించాడు. కొద్దిరోజుల క్రితమే కసోలి గ్రామానికి చెందిన తన్ను అనే యువతితో అతని వివాహం జరిగింది. అయితే ఈ పెళ్లి తన్నుకు ఇష్టం లేకపోవడంతో, పెళ్లికి ముందే సోను అనే యువకుడితో ఉన్న ప్రేమ వ్యవహారాన్ని కొనసాగించింది. పెళ్లి అనంతరం కూడా ఇద్దరూ రహస్యంగా మాట్లాడుకుంటూ ఉండేవారు. తమ ప్రేమకు అడ్డుగా ఉన్న మోనును హత్య చేయాలని ఇద్దరూ కలిసి పథకం రచించారు.

పథకం ప్రకారం పిలిపించి హత్య

జూన్ 8 రాత్రి తన్ను తన భర్త మోనును కసోలి గ్రామానికి రమ్మని పిలిచింది. అప్పటికే సోను పంపిన హరిఓమ్, అమన్ అనే ఇద్దరు వ్యక్తులు అక్కడ సిద్ధంగా ఉన్నారు. మోను అక్కడికి చేరుకోగానే అతడిని పట్టుకుని ముక్కు, నోరు మూసి ఊపిరాడకుండా చేశారు. స్పృహ కోల్పోయిన మోనును అసల్వాస్ కాల్వలో పడేశారు. అనంతరం అతడు ప్రయాణించిన ఎలక్ట్రిక్ స్కూటర్‌ను కాల్వ ఒడ్డున వదిలి అక్కడి నుంచి పరారయ్యారు. దీంతో ఇది ప్రమాదవశాత్తు జరిగిన ఘటనగా కనిపించేలా కుట్ర పన్నారు.

అంత్యక్రియల్లో కన్నీటి నాటకం

జూన్ 10న కాల్వలో మోను మృతదేహం లభ్యమైంది. శరీరంపై పెద్దగా గాయాలు లేకపోవడంతో పోలీసులు ప్రమాద మరణంగా కేసు నమోదు చేసి మృతదేహాన్ని కుటుంబ సభ్యులకు అప్పగించారు. భర్త మరణించాడని తెలిసిన తన్ను అత్తింటికి చేరుకుని శవంపై పడి విలపించింది. అంత్యక్రియల్లో పాల్గొని సంప్రదాయ ఆచారాలన్నీ నిర్వహించింది. దీంతో ఆమె నిజంగానే భర్తను కోల్పోయిన బాధలో ఉందని కుటుంబ సభ్యులు, బంధువులు నమ్మారు.

డిలీట్ చేసిన చాట్స్‌తో బయటపడిన నిజం

జూన్ 11న పోలీసులు మోను మొబైల్ ఫోన్‌ను కుటుంబ సభ్యులకు అప్పగించారు. ఫోన్‌ను పరిశీలించిన కుటుంబ సభ్యులకు అందులోని కాల్ హిస్టరీ, చాట్స్ అన్నీ డిలీట్ చేయబడి ఉండటంతో అనుమానం కలిగింది. దీంతో నిపుణుల సహాయంతో డేటాను రికవరీ చేయించగా సంచలన విషయాలు బయటపడ్డాయి.

49 కాల్స్.. హత్యకు పక్కా ఆధారాలు

రికవరీ చేసిన డేటా ప్రకారం, జూన్ 8న మోను అదృశ్యమయ్యే ముందు తన్నుకు ఆమె ప్రియుడు సోను ఏకంగా 49 సార్లు ఫోన్ చేసినట్లు గుర్తించారు. అలాగే తన్ను తన భర్తను సంఘటన స్థలానికి రమ్మని పిలిచిన చాట్స్, అతడిని హత్య చేయడానికి ఇద్దరూ కలిసి వేసుకున్న పథకానికి సంబంధించిన సందేశాలు కూడా బయటపడ్డాయి.

పోలీసుల నిర్లక్ష్యం.. ఎస్పీ జోక్యంతో అరెస్టులు

మోను కుటుంబ సభ్యులు మొదట ఈ ఆధారాలను స్థానిక పోలీసులకు చూపించినా వారు పెద్దగా పట్టించుకోలేదని ఆరోపించారు. అనంతరం డీఎస్పీని ఆశ్రయించినా న్యాయం జరగకపోవడంతో జూలై 2న జిల్లా ఎస్పీని కలిసి ఫిర్యాదు చేశారు. ఎస్పీ ఆదేశాలతో ప్రత్యేకంగా విచారణ చేపట్టిన పోలీసులు భార్య తన్నుతో పాటు హరిఓమ్‌ను అరెస్ట్ చేశారు.

ప్రియుడు పరారీలో.. గాలింపు కొనసాగుతోంది

విచారణలో తన్ను తన ప్రియుడు సోనుతో కలిసి భర్తను హత్య చేయించినట్లు అంగీకరించినట్లు పోలీసులు తెలిపారు. ప్రస్తుతం ప్రధాన నిందితుడు సోను, అతని అనుచరుడు అమన్ పరారీలో ఉన్నారని, వారి కోసం గాలింపు కొనసాగుతోందని డీఎస్పీ సురేందర్ షియోరన్ వెల్లడించారు.

— శ్రీనివాస్ నాయక్, స్టేట్ బ్యూరో, నిజం న్యూస్