38 మందికి ఉరిశిక్ష ఖరారు.. అహ్మదాబాద్ వరుస పేలుళ్ల కేసులో గుజరాత్ హైకోర్టు సంచలన తీర్పు
దేశాన్ని ఉలిక్కిపడేలా చేసిన 2008 అహ్మదాబాద్ వరుస బాంబు పేలుళ్ల కేసులో గుజరాత్ హైకోర్టు సంచలన తీర్పు వెలువరించింది.
నిజం న్యూస్, జూలై 7, 2026
దేశాన్ని ఉలిక్కిపడేలా చేసిన 2008 అహ్మదాబాద్ వరుస బాంబు పేలుళ్ల కేసులో గుజరాత్ హైకోర్టు సంచలన తీర్పు వెలువరించింది. ప్రత్యేక కోర్టు 2022లో విధించిన శిక్షలను సమర్థిస్తూ 38 మంది దోషులకు ఉరిశిక్షను, మరో 11 మందికి యావజ్జీవ కారాగార శిక్షను మంగళవారం ఖరారు చేసింది. విచారణ కోర్టు తీర్పును సవాలు చేస్తూ దాఖలైన అన్ని అప్పీళ్లను హైకోర్టు కొట్టివేసింది. దీంతో దేశంలోని అతిపెద్ద ఉగ్రవాద కేసుల్లో ఒకటైన ఈ కేసులో ప్రత్యేక కోర్టు తీర్పుకు మరోసారి న్యాయస్థానం మద్దతు లభించింది.
70 నిమిషాల్లో 21 చోట్ల పేలుళ్లు
2008 జూలై 26న సాయంత్రం కేవలం 70 నిమిషాల వ్యవధిలో అహ్మదాబాద్ నగరంలోని 21 ప్రాంతాల్లో వరుస బాంబు పేలుళ్లు జరిగాయి. బస్సులు, మార్కెట్లు, జనసంచారం ఎక్కువగా ఉండే ప్రాంతాలతో పాటు క్షతగాత్రులకు చికిత్స అందిస్తున్న ఆసుపత్రులను కూడా లక్ష్యంగా చేసుకుని ఉగ్రవాదులు పేలుళ్లు జరిపారు. ఈ ఘటనలో 56 మంది ప్రాణాలు కోల్పోగా, 246 మందికి పైగా గాయపడ్డారు. అనంతరం సూరత్ నగరంలో పేలని బాంబులను పోలీసులు స్వాధీనం చేసుకున్నారు.
సుదీర్ఘ విచారణ తర్వాత తీర్పు
ఈ కేసులో మొత్తం 78 మంది నిందితులపై విచారణ జరిగింది. సుదీర్ఘంగా సాగిన విచారణ అనంతరం 2022లో ప్రత్యేక కోర్టు 49 మందిని దోషులుగా తేల్చి, 28 మందిని నిర్దోషులుగా విడుదల చేసింది. దోషుల్లో 38 మందికి ఉరిశిక్ష, 11 మందికి జీవిత ఖైదు విధిస్తూ ఈ కేసును “అత్యంత అరుదైన కేసు”గా పేర్కొంది. ఇప్పుడు అదే తీర్పును గుజరాత్ హైకోర్టు సమర్థించింది.
ఇండియన్ ముజాహిదీన్ కుట్రగా దర్యాప్తు
దర్యాప్తులో ఈ వరుస పేలుళ్ల వెనుక ఉగ్రవాద సంస్థ ఇండియన్ ముజాహిదీన్ సభ్యుల పాత్ర ఉన్నట్లు దర్యాప్తు సంస్థలు నిర్ధారించాయి. పేలుళ్లకు ముందు బెదిరింపు ఈ-మెయిల్స్ పంపడం, పేలుడు పదార్థాల తయారీ, కుట్ర, నిధుల సమీకరణ వంటి అంశాలపై విస్తృతంగా దర్యాప్తు జరిగింది. ఈ కేసులో యూఏపీఏ (UAPA), భారతీయ శిక్షాస్మృతి (IPC)లోని పలు సెక్షన్ల కింద నిందితులపై అభియోగాలు నమోదు చేశారు.
ఉగ్రవాదంపై కఠిన సందేశం
గుజరాత్ హైకోర్టు తాజా తీర్పు దేశంలో ఉగ్రవాద చర్యలపై న్యాయవ్యవస్థ కఠిన వైఖరికి నిదర్శనంగా భావిస్తున్నారు. 18 సంవత్సరాలుగా కొనసాగుతున్న ఈ కేసులో బాధిత కుటుంబాలకు న్యాయం జరిగినట్లు పలువురు అభిప్రాయపడుతున్నారు. అయితే హైకోర్టు తీర్పును సుప్రీంకోర్టులో సవాలు చేసే అవకాశం దోషులకు ఉంది.
— శ్రీనివాస్ నాయక్
స్టేట్ బ్యూరో, నిజం న్యూస్
