మాట తప్పని సంకల్పం.. నాలుగేళ్లుగా చెప్పులు లేకుండానే సత్యవతి రాథోడ్!
కేసీఆర్ మూడోసారి సీఎం అయ్యే వరకు పాదరక్షలు ధరించనని ప్రతిజ్ఞ.. నేటికీ కొనసాగిస్తున్న మాజీ మంత్రి
నిజం న్యూస్ | సెప్టెంబర్ 17, 2026
ఒక్కసారి మాట ఇస్తే.. ఆ మాట కోసం ఎన్ని కష్టాలొచ్చినా వెనక్కి తగ్గని సంకల్పానికి సత్యవతి రాథోడ్ నిలువెత్తు నిదర్శనంగా నిలుస్తున్నారు. బీఆర్ఎస్ అధినేత, తెలంగాణ తొలి ముఖ్యమంత్రి కేసీఆర్ మూడోసారి ముఖ్యమంత్రి అయ్యే వరకు పాదరక్షలు ధరించబోనని 2022 సెప్టెంబర్ 17న ఆమె చేసిన ప్రతిజ్ఞకు నేటితో నాలుగేళ్లు పూర్తయ్యాయి.
ఆరు శాతంగా ఉన్న గిరిజన రిజర్వేషన్లను 10 శాతానికి పెంచిన కేసీఆర్కు కృతజ్ఞతలు తెలుపుతూ ఆమె ఈ సంకల్పాన్ని చేపట్టారు. అప్పటి నుంచి ఎండ, వానలను లెక్కచేయకుండా పాదరక్షలు లేకుండానే ప్రజల్లో తిరుగుతూ తన ప్రతిజ్ఞను కొనసాగిస్తున్నారు.
నాలుగేళ్లుగా అదే పట్టుదల.. అదే సంకల్పం
రాజకీయ కార్యక్రమాలు, ప్రజా సమస్యలపై కార్యక్రమాలు, పార్టీ కార్యక్రమాలు.. ఏదైనా సరే సత్యవతి రాథోడ్ చెప్పులు లేకుండానే పాల్గొంటున్నారు. తన నియోజకవర్గానికే పరిమితం కాకుండా రాష్ట్రవ్యాప్తంగా జరిగే కార్యక్రమాల్లోనూ ఇదే విధానాన్ని కొనసాగిస్తున్నారు.
నిరంతర పర్యటనల కారణంగా అరికాళ్లకు బొబ్బలు వచ్చినా ఆమె వెనక్కి తగ్గలేదు. ఇటీవల మోకాలి శస్త్రచికిత్స చేయించుకున్నప్పటికీ తన సంకల్పాన్ని మాత్రం కొనసాగిస్తున్నారు. వైద్యులు పాదరక్షలు ధరించాలని సూచించినా.. తన ప్రతిజ్ఞ పూర్తయ్యే వరకు చెప్పులు వేసుకోకూడదన్న నిర్ణయానికే కట్టుబడి ఉన్నారు.
ఆమె ఆరోగ్యంపై శ్రద్ధ వహించాలని కేసీఆర్, కేటీఆర్ సూచించినప్పటికీ.. తన సంకల్పం పూర్తయ్యే వరకు పాదరక్షలు ధరించబోనన్న నిర్ణయంలో మార్పు లేదని సత్యవతి రాథోడ్ స్పష్టం చేస్తున్నారు.
గిరిజన బిడ్డగా.. గిరిజన అభివృద్ధికి ప్రత్యేక ముద్ర
గత ప్రభుత్వంలో గిరిజన సంక్షేమ శాఖ మంత్రిగా పనిచేసిన సత్యవతి రాథోడ్ గిరిజన సంక్షేమానికి సంబంధించిన అనేక కార్యక్రమాల్లో భాగస్వాములయ్యారు. సంత్ సేవాలాల్ బంజారా భవన్, కుమ్రం భీమ్ ఆదివాసీ భవన్ నిర్మాణాలు, పోడు భూముల సమస్య పరిష్కారానికి చర్యలు, అర్హులైన గిరిజనులకు పట్టాల అందజేత, గిరిజన విద్యార్థుల కోసం గురుకులాల విస్తరణ వంటి అంశాలకు ప్రాధాన్యం ఇచ్చారు.
గిరిజన బిడ్డగా తన సమాజానికి సేవ చేసే అవకాశం లభించడం తన పూర్వజన్మ సుకృతంగా భావించే సత్యవతి రాథోడ్.. గిరిజనుల అభివృద్ధి, విద్య, సంక్షేమం కోసం తన వంతు కృషి చేశారు.
అభిమానాన్ని సంకల్పంగా మార్చుకున్న నాయకురాలు
కేసీఆర్పై తనకున్న అభిమానం, విశ్వాసాన్ని సత్యవతి రాథోడ్ ఒక ప్రత్యేక సంకల్పంగా మార్చుకున్నారు. నాలుగేళ్లుగా పాదరక్షలు లేకుండా తిరుగుతూ ఆ మాటను నిలబెట్టుకోవడం ఆమె పట్టుదలకు ప్రత్యేక గుర్తింపుగా నిలుస్తోంది.
ఎండైనా.. వానైనా.. రాజకీయ కార్యక్రమమైనా.. ప్రజా కార్యక్రమమైనా.. తన సంకల్పాన్ని మాత్రం వీడకుండా ముందుకు సాగుతున్న ఆమెను చూసి పార్టీ నాయకులు, కార్యకర్తలు ప్రశంసలు వ్యక్తం చేస్తున్నారు.
ఒక రాజకీయ నాయకురాలిగా ఎన్నో కార్యక్రమాలు చేపట్టిన సత్యవతి రాథోడ్.. ఒక వ్యక్తిగత సంకల్పాన్ని నాలుగేళ్లుగా కొనసాగించడం ద్వారా తన పట్టుదలను ప్రత్యేకంగా చాటుకుంటున్నారు.
శ్రీనివాస్ నాయక్ స్టేట్ బ్యూరో
నిజం న్యూస్
