కృష్ణా – వికారాబాద్ రైల్వే మార్గంతో ఎంతో అభివృద్ధి

కృష్ణా – వికారాబాద్ రైల్వే మార్గం అభివృద్ధి తక్షణ అవసరం

తెలంగాణ రాష్ట్రంలోని పశ్చిమ జిల్లాలైన వికారాబాద్, నారాయణపేట ప్రాంతాల సామాజిక ఆర్థిక ముఖచిత్రాన్ని మార్చగల శక్తి కృష్ణ-వికారాబాద్ రైల్వే లైన్‌కు ఉంది.

దశాబ్దాల కాలంగా తీవ్ర నిర్లక్ష్యానికి గురైన ఈ 130 కిలోమీటర్ల పొడవైన నేరుగా రైలు మార్గం ఏర్పాటు అనేది ఈ ప్రాంత ప్రజల చిరకాల స్వప్నం.

ప్రస్తుతం ఈ ప్రాంతాల మధ్య ప్రయాణం కేవలం వాడి జంక్షన్ మీదుగా చాలా దూరం చుట్టూ తిరిగి వెళ్లాల్సి వస్తోంది. ఈ అసౌకర్యం వల్ల ప్రయాణికులకు సమయం వృథా కావడమే కాకుండా రవాణా ఖర్చులు కూడా భారమవుతున్నాయి.

ఈ నేపథ్యంలో రాష్ట్ర ముఖ్యమంత్రి రేవంత్ రెడ్డి ఈ ప్రాజెక్టును కేంద్ర పథకంగా చేపట్టి త్వరితగతిన అభివృద్ధి చేయాలని కేంద్ర రైల్వే మంత్రి అశ్వినీ వైష్ణవ్‌ను కోరడం పట్ల సర్వత్రా హర్షం వ్యక్తమవుతోంది.

ఈ రైల్వే లైన్ నిర్మాణం పూర్తయితే పరిసర ప్రాంతాల్లో ఊహించని పారిశ్రామిక విప్లవం వచ్చే అవకాశం ఉంది.

ముఖ్యంగా టెకల్కోడ్ ప్రాంతంలో అపారమైన సున్నపురాయి నిక్షేపాలు ఉండటం వల్ల అక్కడ భారీ పరిశ్రమలు ఏర్పాటు చేసేందుకు అపార అవకాశాలు ఉన్నాయి.

కోడంగల్, దౌలతాబాద్, టెకల్కోడ్ ప్రాంతాలను సిమెంట్ టెక్స్‌టైల్ పరిశ్రమల హబ్‌గా మార్చాలని రాష్ట్ర ప్రభుత్వం పటిష్టమైన ప్రణాళికలు సిద్ధం చేస్తోంది.

కర్ణాటకలోని సిమెంట్ ప్లాంట్లకు సమీపంలో ఉన్న కృష్ణా ప్రాంతం, ఈ కొత్త రైల్వే లైన్‌తో నేరుగా అనుసంధానం కావడం వల్ల సరుకు రవాణా ఎంతో సులభతరం అవుతుంది.

తద్వారా సిమెంట్ ఇతర పారిశ్రామిక ఉత్పత్తుల రవాణా ఖర్చు తగ్గి స్థానిక వ్యాపారాలు అంతర్జాతీయ స్థాయిలో పోటీ పడటానికి వీలవుతుంది. ఈ మార్గం కేవలం పారిశ్రామిక ఉత్పత్తులకే కాకుండా వ్యవసాయ ఉత్పత్తుల ఎగుమతికి కూడా కీలకం కానుంది.

ఈ ప్రాజెక్టుకు సంబంధించి ఇప్పటికే డీపీఆర్ కోసం క్షేత్రస్థాయి సర్వే పనులు వేగంగా పూర్తయ్యాయి. సాధారణంగా ఏ రైల్వే ప్రాజెక్టుకైనా భూసేకరణ అనేది ఒక పెద్ద అడ్డంకిగా మారుతుంది,

కానీ తెలంగాణ ప్రభుత్వం ఈ భూసేకరణ ఖర్చు మొత్తాన్ని తామే భరిస్తామని కేంద్రానికి స్పష్టమైన హామీ ఇచ్చింది. దీనివల్ల కేంద్రంపై ఆర్థిక భారం గణనీయంగా తగ్గడమే కాకుండా ప్రాజెక్టు పనులు ఎటువంటి జాప్యం లేకుండా పట్టాలెక్కే అవకాశం ఉంది.

ఈ వినూత్న ప్రతిపాదన పట్ల కేంద్ర రైల్వే మంత్రి కూడా సానుకూలత వ్యక్తం చేయడం రాష్ట్ర ప్రయోజనాలకు తోడ్పడుతుంది. దీనితో పాటు శంషాబాద్ విమానాశ్రయం సమీపంలో 500 ఎకరాల భూమిని కేటాయించి, హైదరాబాద్-చెన్నై, బెంగళూరు, పూణే వంటి హై-స్పీడ్ రైలు కారిడార్లకు ప్రధాన హబ్‌గా మార్చాలని రాష్ట్ర ప్రభుత్వం భావిస్తోంది.

దీనివల్ల విమానాశ్రయం రైల్వే నెట్‌వర్క్‌ల మధ్య అనుసంధానం ఏర్పడి ప్రయాణికులకు ప్రపంచ స్థాయి రవాణా సదుపాయాలు అందుబాటులోకి వస్తాయి.

ఈ లైన్ అభివృద్ధి ద్వారా కేవలం రవాణా సౌకర్యాలు మెరుగుపడటమే కాకుండా, స్థానిక యువతకు వేల సంఖ్యలో ప్రత్యక్షంగా పరోక్షంగా ఉపాధి అవకాశాలు లభిస్తాయి. కొత్తగా ఏర్పాటు కాబోయే పారిశ్రామిక జోన్ల వల్ల అనుబంధ వ్యాపారాలు రూపుదిద్దుకుని స్థానిక ఆర్థిక వ్యవస్థ బలోపేతం అవుతుంది.

పర్యావరణ పరంగా చూస్తే రోడ్డు రవాణాపై ఉన్న విపరీతమైన ఒత్తిడి తగ్గి, కాలుష్యం తక్కువగా ఉండే రైలు ప్రయాణం పట్ల ప్రజలు మొగ్గు చూపుతారు. వెనుకబడిన ప్రాంతాలుగా ముద్రపడిన వికారాబాద్ నారాయణపేట జిల్లాలు ఈ నేరుగా రైలు మార్గంతో పారిశ్రామిక పటంలో చోటు సంపాదించుకుంటాయి.

తెలంగాణ రాష్ట్రం సాధిస్తున్న అభివృద్ధిని మరింత వేగవంతం చేయడంలో కృష్ణ-వికారాబాద్ రైల్వే లైన్ ఒక చారిత్రాత్మక మైలురాయిగా నిలవనుంది.

ప్రతిపాదిత మార్గం పనులు సకాలంలో పూర్తయితే తెలంగాణ కర్ణాటక రాష్ట్రాల మధ్య వాణిజ్య సంబంధాలు మరింత పటిష్టం కావడమే కాకుండా లక్షలాది మంది ప్రజల జీవితాల్లో వెలుగులు నిండుతాయి.

(సి.హెచ్.ప్రతాప్, మొబైల్ నెంబర్: 98808 51898)