జూన్ 30 నుంచే రైతు భరోసా జమ.. రైతుల ఖాతాల్లో రూ.9 వేల కోట్లు

నిజం న్యూస్
హైదరాబాద్, జూన్ 29:
రాష్ట్రంలోని రైతులకు వానాకాలం పెట్టుబడి సాయంగా అందించే రైతు భరోసా పథకం నిధుల పంపిణీకి ప్రభుత్వం అన్ని ఏర్పాట్లు పూర్తి చేసింది. ఈ నెల 30న ఖమ్మంలో నిర్వహించనున్న భారీ బహిరంగ సభ వేదికగా రైతు భరోసా నిధుల జమ ప్రక్రియను ప్రారంభించనుంది. ఎకరాకు రూ.6 వేల చొప్పున రైతుల ఖాతాల్లో నేరుగా నగదు జమ చేసేందుకు ప్రభుత్వం సిద్ధమైంది.

రైతు భరోసా పథకం కింద రాష్ట్రవ్యాప్తంగా అర్హులైన రైతులకు నిధులు అందించేందుకు ఆర్థిక శాఖ ఇప్పటికే రూ.9 వేల కోట్లను సిద్ధం చేసినట్లు సమాచారం. జులై 15వ తేదీలోపు రాష్ట్రంలోని రైతులందరి ఖాతాల్లో నిధులు పూర్తిగా జమ అయ్యేలా ప్రభుత్వం ప్రత్యేక కార్యాచరణ ప్రణాళికను రూపొందించింది.

రైతులకు ఎలాంటి ఇబ్బందులు కలగకుండా బ్యాంకుల ద్వారా నేరుగా నిధులు జమ చేయడానికి అవసరమైన అన్ని సాంకేతిక, పరిపాలనా ఏర్పాట్లను అధికారులు పూర్తి చేశారు. రైతు భరోసా నిధుల పంపిణీ 10 నుంచి 15 రోజుల వ్యవధిలో పూర్తయ్యే అవకాశం ఉందని అధికార వర్గాలు వెల్లడించాయి.

ఇదే సమయంలో ఉద్యోగుల బకాయిల చెల్లింపుల కోసం రూ.2 వేల కోట్లను కూడా ప్రభుత్వం సిద్ధం చేసింది. ఉద్యోగుల జీతాలు, పెన్షన్లు, ఆసరా పింఛన్లు, ఇతర సంక్షేమ పథకాల చెల్లింపులతో భారీ మొత్తంలో నగదు చలామణి కానున్న నేపథ్యంలో బ్యాంకుల్లో తగినంత నగదు అందుబాటులో ఉంచాలని కోరుతూ రాష్ట్ర ప్రభుత్వం రిజర్వ్ బ్యాంక్ ఆఫ్ ఇండియా (ఆర్‌బీఐ)కి లేఖ రాసినట్లు తెలిసింది.

జులై మొదటి రెండు వారాల్లో రైతులు పెద్ద ఎత్తున బ్యాంకులకు వచ్చే అవకాశం ఉన్నందున, బ్యాంకింగ్ సేవల్లో ఎలాంటి అంతరాయం కలగకుండా చర్యలు తీసుకోవాలని రాష్ట్ర ఆర్థిక శాఖ అధికారులు బ్యాంకు ప్రతినిధులకు సూచించినట్లు సమాచారం.

70 లక్షల మంది రైతులకు లబ్ధి
రాష్ట్రవ్యాప్తంగా సుమారు 70 లక్షల మంది రైతులకు, దాదాపు కోటి 50 లక్షల ఎకరాలకు రైతు భరోసా కింద ఎకరాకు రూ.6 వేల చొప్పున నిధులు జమ చేయనున్నట్లు అధికారులు చెబుతున్నారు. రైతుల పెట్టుబడి అవసరాలను దృష్టిలో ఉంచుకొని ప్రభుత్వం భారీ స్థాయిలో నిధులను విడుదల చేయనుంది.

అటు రైతు భరోసా నిధులతో పాటు ప్రభుత్వ ఉద్యోగుల పెండింగ్ బకాయిల చెల్లింపులపై కూడా ప్రభుత్వం ప్రత్యేక దృష్టి సారించింది. ఉద్యోగులకు చెల్లించాల్సిన వివిధ రకాల ఏరియర్ల కోసం రూ.2 వేల కోట్లను ప్రత్యేకంగా కేటాయించినట్లు సమాచారం. ఈ బకాయిలను కూడా జులై నెలలోనే చెల్లించాలనే లక్ష్యంతో ప్రభుత్వం ముందుకు సాగుతోంది.

జులైలో రూ.20 వేల కోట్ల వ్యయం
రైతు భరోసా, ఉద్యోగుల బకాయిలు, జీతాలు, పెన్షన్లు, సంక్షేమ పథకాల అమలుతో జులై నెలలో రాష్ట్ర ప్రభుత్వం దాదాపు రూ.20 వేల కోట్ల మేర ఖర్చు చేయాల్సి ఉంటుందని ఆర్థిక శాఖ అంచనా వేసింది. సాధారణంగా ఉద్యోగుల జీతాలు, పెన్షన్లకే సుమారు రూ.6 వేల కోట్ల వరకు వ్యయం అవుతుంది.

ఇంత భారీ మొత్తాన్ని సమర్థవంతంగా నిర్వహించేందుకు ప్రభుత్వం వ్యూహాత్మకంగా చర్యలు చేపట్టింది. ఇందులో భాగంగా ఆర్‌బీఐ నుంచి సుమారు రూ.11,500 కోట్ల రుణాన్ని సమీకరించడంతో పాటు రాష్ట్ర సొంత ఆదాయ వనరులను కూడా అవసరాలకు అనుగుణంగా వినియోగించేందుకు ప్రణాళిక సిద్ధం చేసింది.

ఈ నిధుల నిర్వహణ ద్వారా రైతులకు, ఉద్యోగులకు ఎలాంటి ఆలస్యం లేకుండా చెల్లింపులు జరిగేలా ఆర్థిక శాఖ ప్రత్యేక దృష్టి సారించినట్లు అధికార వర్గాలు వెల్లడించాయి.

– శ్రీనివాస్ నాయక్, స్టేట్ బ్యూరో, నిజం న్యూస్