యాప్ లేకపోయినా యూరియా బుకింగ్ ఇక సులభం.. రూ.10తో మీసేవలోనే సేవలు! రైతులకు తెలంగాణ ప్రభుత్వ గుడ్న్యూస్
స్మార్ట్ఫోన్ వాడకం తెలియక లేదా సాంకేతిక ఇబ్బందుల వల్ల ప్రభుత్వ అధికారిక 'ఫర్టిలైజర్ యాప్' ద్వారా యూరియా బుక్ చేసుకోలేని రైతుల కోసం మీసేవ కేంద్రాల్లో ఈ సేవలను అందుబాటులోకి తీసుకొచ్చింది.
జూలై 9, 2026 | నిజం న్యూస్
తెలంగాణలోని రైతులకు మరింత ఊరటనిస్తూ వ్యవసాయ శాఖ ఒక కీలక నిర్ణయం తీసుకుంది. స్మార్ట్ఫోన్ వాడకం తెలియక లేదా సాంకేతిక ఇబ్బందుల వల్ల ప్రభుత్వ అధికారిక ‘ఫర్టిలైజర్ యాప్’ ద్వారా యూరియా బుక్ చేసుకోలేని రైతుల కోసం మీసేవ కేంద్రాల్లో ఈ సేవలను అందుబాటులోకి తీసుకొచ్చింది.
కేవలం రూ.10 నామినల్ రుసుము చెల్లించి రైతులు తమకు అవసరమైన యూరియాను మీసేవ కేంద్రాల ద్వారా సులభంగా బుక్ చేసుకునే అవకాశం కల్పించారు. దీంతో యాప్ వినియోగంలో ఇబ్బందులు ఎదుర్కొంటున్న రైతులకు ఈ నిర్ణయం ఎంతో ఉపయోగకరంగా మారనుంది.
ఈ ప్రక్రియ కోసం రైతులు తమ పట్టాదార్ పాస్బుక్ నంబర్, ప్రస్తుత సాగు విస్తీర్ణం, పండిస్తున్న పంట వివరాలను మీసేవ కేంద్రంలో అందించాల్సి ఉంటుంది. ఈ వివరాలను సిస్టమ్లో నమోదు చేసిన అనంతరం రైతు రిజిస్టర్డ్ మొబైల్ నంబర్కు వన్-టైమ్ పాస్వర్డ్ (OTP) వస్తుంది. ఆ OTPని ధృవీకరించిన వెంటనే బుకింగ్ ప్రక్రియ పూర్తై, రైతుకు ప్రత్యేకమైన బుకింగ్ ఐడీ (Booking ID) జారీ అవుతుంది.
అయితే రైతులు తప్పనిసరిగా గుర్తుంచుకోవాల్సిన విషయం ఏమిటంటే… ఈ బుకింగ్ ఐడీకి పరిమిత కాలపరిమితి మాత్రమే ఉంటుంది. యూరియా బుక్ చేసిన తేదీని మినహాయించి, ఆ తర్వాత కేవలం 48 గంటలు (రెండు రోజులు) మాత్రమే ఈ బుకింగ్ ఐడీ చెల్లుబాటులో ఉంటుంది.
కాబట్టి నిర్ణీత గడువు ముగిసేలోపు రైతులు తమకు కేటాయించిన డీలర్ లేదా సహకార సంఘం (సొసైటీ) వద్దకు వెళ్లి, బుకింగ్ ఐడీని చూపించి యూరియా స్టాక్ను తీసుకోవాల్సి ఉంటుంది. గడువు దాటిన తర్వాత బుకింగ్ ఆటోమేటిక్గా రద్దయ్యే అవకాశం ఉండటంతో రైతులు ఈ అవకాశాన్ని సకాలంలో వినియోగించుకోవాలని అధికారులు సూచించారు.
— శ్రీనివాస్ నాయక్
స్టేట్ బ్యూరో, నిజం న్యూస్
