అక్రమ సంబంధం కోసం భర్త హత్య..! గల్ఫ్ నుంచి వచ్చిన భర్తను ప్రియుడితో కలిసి అంతమొందించిన భార్య

నిజం న్యూస్ | నిజామాబాద్ | జూలై 6, 2026

నిజామాబాద్ జిల్లాలో ఓ దారుణ హత్యకేసు వెలుగులోకి వచ్చింది. గల్ఫ్ దేశంలో ఉద్యోగం చేస్తూ కుటుంబాన్ని పోషిస్తున్న భర్త స్వగ్రామానికి తిరిగి రావడంతో తమ వివాహేతర సంబంధానికి అడ్డుగా మారుతాడని భావించిన భార్య, తన ప్రియుడు మరియు అతని స్నేహితుడితో కలిసి పక్కా పథకం ప్రకారం భర్తను హత్య చేసిన ఘటన సంచలనం సృష్టించింది. మొదట ప్రమాదంగా కనిపించిన ఈ కేసును పోలీసులు ఛేదించడంతో అసలు నిజాలు బయటపడ్డాయి.

పోలీసుల వివరాల ప్రకారం, నిజామాబాద్ జిల్లా న్యాల్‌కల్ గ్రామానికి చెందిన దాయిని ప్రశాంత్ (35) గల్ఫ్ దేశంలో ఉద్యోగం చేస్తూ కుటుంబాన్ని పోషించేవాడు. జూన్ 27న స్వగ్రామానికి తిరిగి వచ్చాడు. అయితే అతని భార్య దాయిని సంధ్యకు నిజామాబాద్ ఇంద్రపూర్ కాలనీకి చెందిన అనిల్ అనే వ్యక్తితో కొంతకాలంగా వివాహేతర సంబంధం కొనసాగుతోంది. ప్రశాంత్ ఇంటికి రావడంతో తమ అక్రమ సంబంధానికి ఆటంకం ఏర్పడుతుందని భావించిన సంధ్య, ప్రియుడు అనిల్‌తో కలిసి అతడిని హత్య చేయాలని నిర్ణయించుకుంది.

ఈ కుట్రను అమలు చేయడానికి న్యాల్‌కల్ గ్రామానికే చెందిన కంది వెంకట సాయి అలియాస్ బంటి సహాయాన్ని కోరారు. ముగ్గురూ కలిసి ప్రశాంత్‌ను హత్య చేసేందుకు పక్కా ప్రణాళిక రూపొందించారు. పథకం ప్రకారం జూన్ 29న వెంకట సాయి ప్రశాంత్‌కు పరిమితికి మించి మద్యం తాగించి ఇంటి డాబాపైకి తీసుకెళ్లాడు. ఈ సమయంలో సంధ్య ఫోన్ ద్వారా సూచనలు ఇస్తుండగా, వెంకట సాయి ప్రశాంత్‌ను డాబాపై నుంచి కిందకు తోసేశాడు.

డాబాపై నుంచి కిందపడటంతో ప్రశాంత్ తీవ్రంగా గాయపడ్డాడు. అయితే అతడు అక్కడికక్కడే మృతి చెందకపోవడంతో నిందితులు తమపై అనుమానం రాకుండా ఉండేందుకు అతడిని ప్రభుత్వ ఆసుపత్రికి తరలించారు. అక్కడ వైద్యులు పరిస్థితి విషమంగా ఉందని చెప్పడంతో అనంతరం ఓ ప్రైవేట్ ఆసుపత్రికి తరలించి చికిత్స అందించారు. ఈ సమయంలో ప్రియుడు అనిల్ కూడా ఆసుపత్రికి చేరుకున్నట్లు విచారణలో వెల్లడైంది.

ప్రశాంత్ ప్రాణాలతో బయటపడితే తమ కుట్ర బయటపడుతుందనే భయంతో నిందితులు మరోసారి హత్యకు పథకం రచించారు. చికిత్స అనంతరం రాత్రి సమయంలో ప్రశాంత్‌ను ఇంటికి తీసుకొచ్చిన తర్వాత, అనిల్ సూచనల మేరకు సంధ్య అతని చేతికి అమర్చిన సెలైన్ కాన్యులా ద్వారా మత్తుమందులు, టాయిలెట్ క్లీనర్ కలిపిన ద్రవాన్ని శరీరంలోకి ఎక్కించినట్లు పోలీసులు గుర్తించారు.

అయినప్పటికీ ప్రశాంత్ ప్రాణాలతో ఉండటంతో, అతడిని మంచంపై నుంచి కిందకు తోసి ఊపిరాడకుండా చేసి హత్య చేసినట్లు దర్యాప్తులో తేలింది. అనంతరం సహజ మరణంగా చిత్రీకరించే ప్రయత్నం చేసినప్పటికీ, ప్రశాంత్ మృతిపై అతని కుటుంబ సభ్యులకు అనుమానాలు వ్యక్తమయ్యాయి.

ముఖ్యంగా ప్రశాంత్ తల్లి తన కోడలి ప్రవర్తనపై అనుమానం వ్యక్తం చేస్తూ పోలీసులకు ఫిర్యాదు చేయడంతో కేసు కొత్త మలుపు తిరిగింది. పోలీసులు కాల్ డేటా, సాంకేతిక ఆధారాలు, వైద్య నివేదికలు, నిందితుల కదలికలు, స్థానికుల వాంగ్మూలాలను సేకరించి లోతుగా విచారణ చేపట్టారు. విచారణలో సంధ్య, ఆమె ప్రియుడు అనిల్, వెంకట సాయి కలిసి పథకం ప్రకారం ప్రశాంత్‌ను హత్య చేసినట్లు నిర్ధారణ అయింది.

నిందితులను అదుపులోకి తీసుకుని ప్రశ్నించగా నేరాన్ని అంగీకరించినట్లు సమాచారం. దీంతో సంధ్య, అనిల్, వెంకట సాయిపై హత్య, నేర కుట్ర తదితర సెక్షన్ల కింద కేసులు నమోదు చేసి అరెస్టు చేశారు.

గల్ఫ్‌లో కష్టపడి కుటుంబాన్ని పోషిస్తున్న వ్యక్తి చివరకు భార్య, ఆమె ప్రియుడి కుట్రకు బలికావడం స్థానికులను కలచివేసింది. అక్రమ సంబంధం కోసం భర్తను అడ్డుతొలగించాలనే ప్రయత్నం ఒక కుటుంబాన్ని ఛిన్నాభిన్నం చేసింది. నిందితులకు కఠిన శిక్ష విధించాలని గ్రామస్తులు, మృతుడి కుటుంబ సభ్యులు డిమాండ్ చేస్తున్నారు.

– శ్రీనివాస్ నాయక్

స్టేట్ బ్యూరో, నిజం న్యూస్