నా మరణమే బర్త్డే గిఫ్ట్’.. వీడియో కాల్ తర్వాత యువతి మృతి!
మృతికి ముందు ఆమె చేసినట్లు చెబుతున్న వీడియో కాల్, అందులో "నా మరణమే నీకు బర్త్డే గిఫ్ట్" అని చెప్పినట్లు వెలువడిన సమాచారం ఈ కేసును మరింత మిస్టరీగా మార్చింది.
ప్రేమ అనుమానాలు, మిస్టరీగా మారిన లంగర్ హౌస్ ఘటన
హైదరాబాద్, జూలై 3 (నిజం న్యూస్): హైదరాబాద్లోని లంగర్ హౌస్లో యువతి రేణుక అనుమానాస్పద పరిస్థితుల్లో మృతి చెందడం సంచలనం సృష్టించింది. మృతికి ముందు ఆమె చేసినట్లు చెబుతున్న వీడియో కాల్, అందులో “నా మరణమే నీకు బర్త్డే గిఫ్ట్” అని చెప్పినట్లు వెలువడిన సమాచారం ఈ కేసును మరింత మిస్టరీగా మార్చింది.
అల్వాల్కు చెందిన రేణుక కొంతకాలంగా తన భర్తకు దూరంగా ఉంటున్నట్లు సమాచారం. ఈ సమయంలో ఫరూక్ అనే వ్యక్తితో ఆమెకు సన్నిహిత పరిచయం ఏర్పడినట్లు పోలీసులు ప్రాథమిక విచారణలో గుర్తించినట్లు తెలుస్తోంది. ఇద్దరూ గత నెల రోజులుగా నగరంలోని ఓ హోటల్కు తరచూ వెళ్తున్నట్లు సమాచారం.
ఘటన జరిగిన రోజున కూడా ఇద్దరూ హోటల్లో ఉన్నట్లు తెలుస్తోంది. అనంతరం తాను కొద్దిసేపు బయటకు వెళ్లి తిరిగి వచ్చేసరికి రేణుక ఉరివేసుకుని కనిపించిందని ఫరూక్ పోలీసులకు తెలిపినట్లు సమాచారం. అయితే ఈ వాదనతో పాటు ఘటనలోని ప్రతి అంశాన్ని పోలీసులు నిశితంగా పరిశీలిస్తున్నారు.
దర్యాప్తులో భాగంగా రేణుక మరణానికి ముందు ఓ వ్యక్తితో ఫోన్లో మాట్లాడినట్లు పోలీసులు గుర్తించినట్లు సమాచారం. అనంతరం ఆమె తన స్నేహితురాలికి వీడియో కాల్ చేసి, “నా మరణమే నీకు బర్త్డే గిఫ్ట్” అని చెప్పినట్లు తెలుస్తోంది. ఆ తర్వాత కొద్దిసేపటికే ఆమె మృతి చెందినట్లు సమాచారం. ఆ ఫోన్ కాల్స్, మొబైల్ డేటా, సీసీటీవీ ఫుటేజీలు, ఫోరెన్సిక్ ఆధారాలను పోలీసులు విశ్లేషిస్తున్నారు.
మరోవైపు రేణుక కుటుంబ సభ్యులు ఇది ఆత్మహత్య కాదని, హత్య చేసి ఆత్మహత్యగా చిత్రీకరించారని ఆరోపిస్తున్నారు. దీంతో కేసు మరింత ప్రాధాన్యత సంతరించుకుంది. గోల్కొండ పోలీసులు ఫరూక్ను అదుపులోకి తీసుకుని విచారిస్తున్నారు.
రేణుక నగరంలోని కింగ్స్ అండ్ క్వీన్స్ రెస్టారెంట్లో బార్ డ్యాన్సర్గా పనిచేస్తున్నట్లు సమాచారం. పోస్టుమార్టం నివేదిక, ఫోరెన్సిక్ పరీక్షలు, డిజిటల్ ఆధారాలు, సాక్షుల వాంగ్మూలాల ఆధారంగా అసలు నిజం వెలుగులోకి వచ్చే అవకాశముందని అధికారులు భావిస్తున్నారు.
ప్రస్తుతం ఈ కేసులో ఎవరిపైనా పోలీసులు అధికారికంగా హత్య కేసు నమోదు చేసినట్లు ప్రకటించలేదు. ఆత్మహత్య, ప్రేరేపిత ఆత్మహత్య లేదా ఇతర కోణాలపై దర్యాప్తు కొనసాగుతోంది. అధికారిక దర్యాప్తు పూర్తయ్యే వరకు అన్ని వివరాలు విచారణలోనే ఉన్నాయని పోలీసులు పేర్కొంటున్నారు.
— శ్రీనివాస్ నాయక్
స్టేట్ బ్యూరో, నిజం న్యూస్
