విధి నిర్వహణలోనే విషాదం.. లారీ ఢీకొని డీటీవో వెంకన్న మృతి

భూపాలపల్లి, జూన్ 22 (నిజం న్యూస్):

జయశంకర్ భూపాలపల్లి జిల్లా రవాణా శాఖలో తీవ్ర విషాదం చోటుచేసుకుంది. జిల్లా రవాణా అధికారి (డీటీవో) మద్దోజు వెంకన్న సోమవారం ఉదయం విధి నిర్వహణలో ఉండగా జరిగిన రోడ్డు ప్రమాదంలో దుర్మరణం చెందారు. జిల్లా రవాణా అధికారి కార్యాలయం ఎదుట వాహనాల తనిఖీలు నిర్వహిస్తున్న సమయంలో బొగ్గు లోడుతో వెళ్తున్న ఓ లారీ అదుపుతప్పి ఆయనపైకి దూసుకెళ్లింది.

ప్రమాదంలో లారీ వెంకన్న నడుము భాగంపై నుంచి వెళ్లడంతో ఆయనకు తీవ్ర గాయాలయ్యాయి. ఘటనాస్థలంలోనే ఆయన ప్రాణాలు కోల్పోయినట్లు అధికారులు తెలిపారు. సమాచారం అందుకున్న పోలీసులు, రవాణా శాఖ అధికారులు, సిబ్బంది వెంటనే సంఘటనా స్థలానికి చేరుకుని మృతదేహాన్ని భూపాలపల్లి ఏరియా ఆసుపత్రికి తరలించారు.

ప్రమాదానికి కారణమైన లారీ డ్రైవర్‌ను పోలీసులు అదుపులోకి తీసుకుని కేసు నమోదు చేశారు. ప్రమాదానికి దారితీసిన పరిస్థితులపై దర్యాప్తు కొనసాగుతోంది.

సేవా ప్రస్థానంలో ఎదిగిన అధికారి

మద్దోజు వెంకన్న 2012 బ్యాచ్‌కు చెందిన రవాణా శాఖ అధికారి. తన సేవా జీవితాన్ని మోటార్ వెహికల్ ఇన్‌స్పెక్టర్ (ఎంవీఐ)గా ప్రారంభించిన ఆయన క్రమంగా శాఖలో ఉన్నత స్థానాలకు ఎదిగారు. వరంగల్, అశ్వారావుపేట, మహబూబాబాద్, జగిత్యాల వంటి ప్రాంతాల్లో సేవలందించిన ఆయన ఇటీవలే బదిలీపై జయశంకర్ భూపాలపల్లి జిల్లా రవాణా అధికారిగా బాధ్యతలు స్వీకరించారు.

మహబూబాబాద్ జిల్లాకు చెందిన వెంకన్న

వెంకన్న స్వస్థలం మహబూబాబాద్ జిల్లా మరిపెడ మండలం. ఆయన తండ్రి మద్దోజు బ్రహ్మయ్య. కుటుంబంలో భార్య, ఇద్దరు కుమార్తెలు, ఒక కుమారుడు ఉన్నారు. విధి పట్ల అంకితభావంతో పనిచేసే అధికారిగా ఆయనకు శాఖలో మంచి గుర్తింపు ఉంది.

రవాణా శాఖలో తీవ్ర విషాదం

విధి నిర్వహణలోనే ఓ జిల్లా స్థాయి అధికారి ప్రాణాలు కోల్పోవడం రవాణా శాఖలో తీవ్ర విషాదాన్ని నింపింది. సహోద్యోగులు, ప్రజాప్రతినిధులు, వివిధ శాఖల అధికారులు వెంకన్న మృతి పట్ల తీవ్ర సంతాపం వ్యక్తం చేస్తున్నారు. ఆయన ఆకస్మిక మరణం రవాణా శాఖకు తీరని లోటని పేర్కొంటున్నారు.

విధి నిర్వహణలో ప్రాణాలు కోల్పోయిన డీటీవో వెంకన్నకు అధికార యంత్రాంగం, ప్రజాప్రతినిధులు, సహోద్యోగులు ఘన నివాళులు అర్పించారు.

_శ్రీనివాస్ నాయక్

స్టేట్ బ్యూరో, నిజం న్యూస్