స్కూల్ బస్సులు, పిల్లల భద్రతపై రాజీలేదు.. రెండో రోజూ ఆర్టీఏ తనిఖీలు కొనసాగింపు

మహబూబాబాద్, జూన్ 16, 2026 (నిజం న్యూస్):

నూతన విద్యా సంవత్సరం ప్రారంభమైన నేపథ్యంలో విద్యార్థుల భద్రతను అత్యంత ప్రాధాన్యంగా తీసుకున్న మహబూబాబాద్ జిల్లా రవాణా శాఖ అధికారులు రెండో రోజూ స్కూల్ వాహనాలపై విస్తృత తనిఖీలు కొనసాగించారు. రాష్ట్ర రవాణా కమిషనర్ ఆదేశాల మేరకు జిల్లా రవాణా అధికారి శంకర్ నాయక్ ఆధ్వర్యంలో జిల్లాలోని పాఠశాల బస్సులు, విద్యార్థులను తరలిస్తున్న ఇతర వాహనాలపై ఆకస్మిక తనిఖీలు నిర్వహించారు.

ఈ తనిఖీల్లో ఫిట్‌నెస్ నిబంధనలు పాటించకుండా విద్యార్థులను రవాణా చేస్తున్న రెండు స్కూల్ బస్సులను గుర్తించిన అధికారులు వెంటనే సీజ్ చేశారు. పిల్లల భద్రత విషయంలో ఎలాంటి నిర్లక్ష్యాన్నీ ఉపేక్షించబోమని రవాణా శాఖ స్పష్టం చేసింది.

స్కూల్ యాజమాన్యాలకు అధికారులు కఠిన హెచ్చరికలు జారీ చేశారు. బస్సులకు తప్పనిసరిగా ఫిట్‌నెస్ సర్టిఫికెట్, అగ్నిమాపక పరికరాలు, అత్యవసర ద్వారాలు, సీసీ కెమెరాలు, భద్రతా ప్రమాణాలు ఉండాలని సూచించారు. ఫిట్‌నెస్ లేకుండా బడి బస్సులు రోడ్డుపైకి తీసుకురావొద్దని స్పష్టం చేశారు.

అదేవిధంగా, ఆటోల్లో స్కూల్ పిల్లలను ఓవర్‌లోడ్ చేసి తరలించరాదని అధికారులు హెచ్చరించారు. ఇతర వాహనాల ద్వారా విద్యార్థులను తరలించే సమయంలో కూడా పూర్తి భద్రతా జాగ్రత్తలు తీసుకోవాలని సూచించారు. పిల్లల ప్రాణ భద్రత విషయంలో ఎట్టి పరిస్థితుల్లోనూ రాజీ ఉండదని అధికారులు తెలిపారు.

జిల్లా రవాణా అధికారి శంకర్ నాయక్ స్వయంగా క్షేత్రస్థాయిలో హాజరై తనిఖీలను పర్యవేక్షించడంతో రవాణా నిబంధనల అమలు మరింత కఠినంగా మారిందని అధికారులు పేర్కొన్నారు. ఆయన తీసుకుంటున్న వేగవంతమైన నిర్ణయాలు, కఠిన చర్యలు విద్యార్థుల భద్రతపై ప్రభుత్వానికి ఉన్న నిబద్ధతను ప్రతిబింబిస్తున్నాయని, తల్లిదండ్రుల్లో మరింత విశ్వాసాన్ని కలిగిస్తున్నాయని స్థానికులు అభిప్రాయపడుతున్నారు.

భవిష్యత్తులో కూడా ఇలాంటి ప్రత్యేక తనిఖీ డ్రైవ్‌లు కొనసాగుతాయని రవాణా శాఖ అధికారులు తెలిపారు.

ఈ తనిఖీల్లో ఎం. మహేందర్ ఎంవీఐ, ఖాసిం సాహెబ్ ఏఎంవీఐ, విజయశాంతి ఏఎంవీఐ, వెంకట్ రెడ్డి ఏఎంవీఐతో పాటు రవాణా శాఖ సిబ్బంది పాల్గొన్నారు.

– శ్రీనివాస్ నాయక్

స్టేట్ బ్యూరో, నిజం న్యూస్