స్వయం సహాయక సంఘాల మహిళలకు ఆరోగ్య రక్షణ

– తెలంగాణలో విస్తృత పరీక్షలు, హెచ్‌పీవీ టీకా కార్యక్రమం

మహిళల ఆరోగ్యం సమాజ ఆరోగ్యానికి మూలస్తంభం. కుటుంబ వ్యవస్థలో మహిళ కీలక పాత్ర పోషిస్తుండటంతో ఆమె ఆరోగ్యాన్ని సంరక్షించడం అత్యంత అవసరం.

ఈ విషయాన్ని గుర్తించిన తెలంగాణ ప్రభుత్వం స్వయంసహాయక సంఘాల మహిళల కోసం ప్రత్యేక ఆరోగ్య కార్యక్రమాన్ని ప్రారంభించింది.

రాష్ట్రవ్యాప్తంగా సుమారు 46 లక్షల స్వయంసహాయక సంఘాల మహిళలకు సమగ్ర ఆరోగ్య పరీక్షలు నిర్వహించడంతో పాటు గర్భాశయ కంఠ క్యాన్సర్‌ నివారణకు హెచ్‌పీవీ టీకా కార్యక్రమాన్ని కూడా ప్రారంభించడం ఒక ముఖ్యమైన ముందడుగుగా భావించబడుతోంది.

స్వయంసహాయక సంఘాలు గ్రామీణ ఆర్థిక వ్యవస్థలో కీలక పాత్ర పోషిస్తున్నాయి. ఈ సంఘాల ద్వారా మహిళలు ఆర్థిక స్వావలంబన సాధించడంతో పాటు కుటుంబాల సంక్షేమానికి తోడ్పడుతున్నారు.

అయితే గ్రామీణ ప్రాంతాల్లో చాలా మంది మహిళలు ఆరోగ్య సమస్యలను నిర్లక్ష్యం చేయడం లేదా సరైన సమయంలో వైద్య పరీక్షలు చేయించుకోలేకపోవడం సాధారణంగా కనిపించే పరిస్థితి.

ఈ నేపథ్యంలో ప్రభుత్వము చేపట్టిన ఆరోగ్య పరిశీలన కార్యక్రమం మహిళల ఆరోగ్య పరిరక్షణకు ఎంతో ఉపయోగకరంగా నిలవనుంది.

ఈ కార్యక్రమంలో భాగంగా మహిళలకు సాధారణ ఆరోగ్య పరీక్షలు నిర్వహించడంతో పాటు రక్తపోటు, రక్తహీనత, మధుమేహం వంటి వ్యాధులను ముందుగానే గుర్తించే ప్రయత్నం చేస్తున్నారు.

గ్రామ స్థాయి ఆరోగ్య సిబ్బంది, వైద్య బృందాలు కలిసి మహిళలను పరీక్షించి అవసరమైన చికిత్సకు మార్గదర్శకత్వం ఇవ్వనున్నారు.

అవసరమైతే సమీప వైద్యశాలలకు తరలించి చికిత్స అందించే ఏర్పాట్లు కూడా చేస్తున్నారు.

ఇదే సమయంలో గర్భాశయ కంఠ క్యాన్సర్‌ నివారణ కోసం హెచ్‌పీవీ టీకా కార్యక్రమాన్ని ప్రారంభించడం ప్రత్యేక ప్రాధాన్యాన్ని సంతరించుకుంది.

గర్భాశయ కంఠ క్యాన్సర్‌ భారతదేశంలో మహిళల్లో కనిపించే ముఖ్యమైన క్యాన్సర్‌లలో ఒకటి.

ప్రారంభ దశలోనే నివారణ చర్యలు తీసుకుంటే ఈ వ్యాధిని గణనీయంగా తగ్గించవచ్చని వైద్య నిపుణులు సూచిస్తున్నారు.

హెచ్‌పీవీ టీకా ఈ వ్యాధి నివారణలో అత్యంత ప్రభావవంతమైన చర్యగా భావించబడుతోంది.

ప్రభుత్వం ఈ కార్యక్రమాన్ని గ్రామ స్థాయిలో అమలు చేసేందుకు మహిళా సంఘాల సహకారాన్ని కూడా తీసుకుంటోంది. స్వయంసహాయక సంఘాల నాయకులు తమ సభ్యులను ఆరోగ్య పరీక్షలకు ప్రోత్సహిస్తూ అవగాహన కల్పిస్తున్నారు.

ఆరోగ్యంపై అవగాహన పెరగడం ద్వారా మహిళలు తమ ఆరోగ్యాన్ని క్రమం తప్పకుండా పరీక్షించుకోవడానికి ముందుకు వస్తారని అధికారులు భావిస్తున్నారు.

మహిళల ఆరోగ్యం మెరుగుపడితే కుటుంబ ఆరోగ్యం మెరుగుపడుతుంది. కుటుంబం ఆరోగ్యంగా ఉంటే సమాజం కూడా ఆరోగ్యంగా మారుతుంది.

ఈ దృష్టితో తెలంగాణ ప్రభుత్వం చేపట్టిన ఈ కార్యక్రమం మహిళల ఆరోగ్య పరిరక్షణలో ఒక ముఖ్యమైన అడుగుగా నిలుస్తోంది.

సమగ్ర ఆరోగ్య పరీక్షలు, హెచ్‌పీవీ టీకా కార్యక్రమం సమర్థవంతంగా అమలైతే రాష్ట్రంలోని లక్షలాది మహిళలకు ఆరోగ్య భద్రత లభించడంతో పాటు భవిష్యత్తులో తీవ్రమైన వ్యాధుల నుంచి రక్షణ పొందే అవకాశాలు పెరుగుతాయి.

(సి.హెచ్.ప్రతాప్)

మొబైల్ నెంబర్: 98808 51898