అలర్ట్ …రానున్న మూడు రోజులు తెలంగాణలో వర్షాలు, పిడుగులు

హైదరాబాద్, మే 05:
తెలంగాణ రాష్ట్రంలో వాతావరణం పూర్తిగా అనిశ్చితంగా మారుతోంది. ఒకవైపు తీవ్రమైన ఎండలు కొనసాగుతుండగా, మరోవైపు ఆకస్మికంగా మేఘాలు కమ్ముకుని ఉరుములు, మెరుపులతో కూడిన వర్షాలు కురుస్తున్నాయి.

రాష్ట్ర విపత్తుల నిర్వహణ సంస్థ హెచ్చరికల ప్రకారం రానున్న మూడు రోజులు ఇదే పరిస్థితి కొనసాగనుంది. ప్రజలు అత్యంత అప్రమత్తంగా ఉండాలని అధికారులు సూచిస్తున్నారు.

ప్రస్తుతం విదర్భ ప్రాంతం నుంచి తెలంగాణ మీదుగా రాయలసీమ వరకు ఒక వాతావరణ ద్రోణి విస్తరించి ఉంది.

దీని ప్రభావంతో తెలంగాణలోని పలు జిల్లాల్లో వర్షాలు కురిసే అవకాశం ఉంది.

ముఖ్యంగా హైదరాబాద్, ఉమ్మడి ఖమ్మం, వరంగల్, నల్గొండ జిల్లాల్లో పిడుగులతో కూడిన మోస్తరు వర్షాలు పడే అవకాశం ఉందని అధికారులు తెలిపారు. ఉత్తర తెలంగాణ జిల్లాల్లో వడగళ్ల వానలు పడే అవకాశం కూడా ఉందని హెచ్చరికలు జారీ చేశారు. కొన్ని ప్రాంతాల్లో గంటకు 50 నుంచి 60 కిలోమీటర్ల వేగంతో ఈదురుగాలులు వీచే అవకాశం ఉంది.

*నిప్పులు చెరుగుతున్న ఎండలు*
వర్షాల మధ్యలోనే రాష్ట్రంలో ఎండల తీవ్రత కూడా కొనసాగుతోంది. కొన్ని జిల్లాల్లో ఉష్ణోగ్రతలు 42 డిగ్రీల సెల్సియస్‌కు పైగా నమోదవుతున్నాయి. మధ్యాహ్న సమయంలో ఉక్కపోత, వేడిగాలుల ప్రభావం ఎక్కువగా ఉండటంతో ప్రజలు ఇబ్బందులు ఎదుర్కొంటున్నారు. సాయంత్రం సమయంలో ఆకస్మికంగా వర్షాలు కురుస్తుండటంతో వాతావరణం మరింత అస్థిరంగా మారుతోంది.

*తెలంగాణలో వాతావరణ పరిస్థితి*
తెలంగాణలో ఉదయం, మధ్యాహ్నం వరకు ఎండలు దంచికొడుతుండగా, సాయంత్రానికి ఈదురుగాలులతో కూడిన వర్షాలు కురుస్తున్నాయి. గాలిలో తేమ పెరగడంతో ఉక్కపోత తీవ్రంగా అనిపిస్తోంది. వడగళ్ల వానల అవకాశం ఉండటంతో రైతులు మరింత జాగ్రత్తగా ఉండాలని అధికారులు సూచిస్తున్నారు.

*ప్రజలకు కీలక సూచనలు*
వాతావరణ మార్పుల కారణంగా పిడుగుల ప్రమాదం ఎక్కువగా ఉంది. వర్షం పడే సమయంలో చెట్ల కింద, బహిరంగ ప్రదేశాల్లో నిలబడకూడదని అధికారులు సూచిస్తున్నారు. బలమైన గాలుల సమయంలో పాత భవనాలు, విద్యుత్ స్తంభాల దగ్గర జాగ్రత్తగా ఉండాలని హెచ్చరిస్తున్నారు. ఎండల తీవ్రత దృష్ట్యా తగినంత నీరు, ద్రవ పదార్థాలు తీసుకోవాలని సూచించారు. రైతులు పొలాల్లో పనులు చేస్తూ వాతావరణ మార్పులను గమనిస్తూ జాగ్రత్తలు తీసుకోవాలని తెలిపారు.

*_శ్రీనివాస్ నాయక్*
*స్టేట్ బ్యూరో, నిజం న్యూస్*