బీఆర్ఎస్కే ప్రజల మొగ్గు..? తెలంగాణ పబ్లిక్ పల్స్–2026 సర్వేలో గులాబీ జోరు
70 స్థానాలతో బీఆర్ఎస్ అధికారంలోకి వచ్చే అవకాశం.. కాంగ్రెస్కు 36 సీట్లు మాత్రమేనని హెచ్ఎంఆర్ సర్వే అంచనా
హైదరాబాద్, జూన్ 26 (నిజం న్యూస్): తెలంగాణ రాజకీయాల్లో మరోసారి బీఆర్ఎస్ పార్టీ ఆధిక్యం సాధించే అవకాశాలు ఉన్నాయని తెలంగాణ పబ్లిక్ పల్స్–2026 పేరుతో విడుదలైన హెచ్ఎంఆర్ సర్వే అంచనా వేసినట్లు రాజకీయ వర్గాల్లో చర్చ జరుగుతోంది. రాష్ట్రంలోని 119 అసెంబ్లీ నియోజకవర్గాల్లో మొత్తం 1,19,595 మంది అభిప్రాయాలను సేకరించి ఈ సర్వే నిర్వహించినట్లు ప్రచారం జరుగుతోంది.
సర్వే వివరాల ప్రకారం, ప్రస్తుత పరిస్థితుల్లో ఎన్నికలు నిర్వహిస్తే బీఆర్ఎస్కు 41.07 శాతం ఓట్లు లభించి 70 అసెంబ్లీ స్థానాలు దక్కే అవకాశం ఉందని పేర్కొన్నట్లు సమాచారం. అధికార కాంగ్రెస్ పార్టీ 35.94 శాతం ఓట్లతో 36 స్థానాలకే పరిమితమయ్యే అవకాశముందని అంచనా వేసినట్లు తెలుస్తోంది.
గత ఎన్నికల అనంతరం రాష్ట్రంలో మారిన రాజకీయ పరిస్థితులు, రైతులు, యువత, ఉద్యోగులు, మహిళలు ఎదుర్కొంటున్న సమస్యలు, ప్రభుత్వంపై పెరుగుతున్న అసంతృప్తి వంటి అంశాలు బీఆర్ఎస్కు అనుకూలంగా మారుతున్నాయని రాజకీయ విశ్లేషకులు అభిప్రాయపడుతున్నట్లు సర్వే విశ్లేషణలో పేర్కొన్నట్లు ప్రచారం జరుగుతోంది.
అలాగే అధికార కాంగ్రెస్ ప్రభుత్వానికి చెందిన పలువురు మంత్రులు తమ నియోజకవర్గాల్లో తీవ్ర పోటీని ఎదుర్కొనే అవకాశం ఉందని కూడా సర్వేలో పేర్కొన్నట్లు సమాచారం. పొన్నం ప్రభాకర్, వివేక్ వెంకటస్వామి, తుమ్మల నాగేశ్వరరావు, సీతక్క, అడ్లూరి లక్ష్మణ్ వంటి నేతల విజయావకాశాలపై సర్వేలో ఆసక్తికర వ్యాఖ్యలు చేసినట్లు ప్రచారం సాగుతోంది.
అయితే ఈ సర్వే ఫలితాలను బీఆర్ఎస్ శ్రేణులు స్వాగతిస్తూ, పార్టీ అధినేత కేసీఆర్ నాయకత్వంపై ప్రజల్లో విశ్వాసం మరింత బలపడుతోందని పేర్కొంటున్నాయి. మరోవైపు కాంగ్రెస్ నాయకులు మాత్రం సర్వేలను నమ్మాల్సిన అవసరం లేదని, ఎన్నికల్లో ప్రజల తీర్పే అంతిమమని స్పష్టం చేస్తున్నారు.
గమనిక: ఈ కథనంలో పేర్కొన్న వివరాలు హెచ్ఎంఆర్ సంస్థ పేరిట ప్రచారంలో ఉన్న సర్వే ఆధారంగా మాత్రమే. ఇవి ఎన్నికల తుది ఫలితాలకు సూచికగా పరిగణించలేము.
— శ్రీనివాస్ నాయక్, స్టేట్ బ్యూరో, నిజం న్యూస్
