వాహనదారులకు ఊరట: దేశ వ్యాప్తంగా టోల్ ఫీజులు తగ్గింపు 

Toll fee: దేశవ్యాప్తంగా వివిధ నగరాల మధ్య ప్రయాణ సమయాన్ని గణనీయంగా తగ్గించడంతో పాటు ఇంధన ఆదా లక్ష్యంగా కేంద్ర ప్రభుత్వం ఎక్స్‌ప్రెస్‌వేల నెట్‌వర్క్‌ను శరవేగంగా విస్తరిస్తోంది.

సాధారణంగా జాతీయ రహదారులతో పోలిస్తే ఈ ఎక్స్‌ప్రెస్‌వేలు అత్యంత వేగవంతమైన, సౌకర్యవంతమైన ప్రయాణ అనుభవాన్ని అందిస్తాయి.

ఈ ప్రత్యేక వసతుల కారణంగానే ఎక్స్‌ప్రెస్‌వేలపై టోల్ ధరలు సాధారణ హైవేల కంటే 25 శాతం ఎక్కువగా ఉంటున్నాయి. అయితే అసంపూర్తిగా ఉన్న ఎక్స్‌ప్రెస్‌వేలపై కూడా పూర్తి స్థాయి టోల్ వసూలు చేయడంపై ప్రయాణికుల నుంచి పెద్ద ఎత్తున నిరసనలు వ్యక్తమయ్యాయి.

ఈ నేపథ్యంలో వాహనదారులకు భారీ ఊరటనిస్తూ కేంద్ర రోడ్డు రవాణా, రహదారుల మంత్రిత్వ శాఖ ఒక కీలక నిర్ణయం తీసుకుంది.

ఫిబ్రవరి 15 నుండి అమలులోకి రానున్న నూతన నిబంధనల ప్రకారం పాక్షికంగా అందుబాటులో ఉన్న ఎక్స్‌ప్రెస్‌వేలపై టోల్ రుసుమును గణనీయంగా తగ్గించనున్నారు.

గతంలో ఉన్న నిబంధనల ప్రకారం ఒక ఎక్స్‌ప్రెస్‌వే ప్రారంభం నుండి ముగింపు వరకు పూర్తి కాకపోయినా సిద్ధమైన భాగానికి పూర్తి స్థాయి ఎక్స్‌ప్రెస్‌వే టోల్ వసూలు చేసేవారు. దీనివల్ల రోడ్డు పనులు కొనసాగుతున్నా, ప్రయాణంలో అడ్డంకులు ఉన్నా వాహనదారులు అదనంగా 25 శాతం రుసుమును చెల్లించాల్సి వచ్చేది.

మధ్యప్రదేశ్‌లోని ఎన్‌హెచ్-46 మార్గంలో ఇలాంటి అసంపూర్ణ ప్రాజెక్టులకు కూడా అధిక టోల్ వసూలు చేస్తున్నారని ప్రభుత్వానికి అనేక ఫిర్యాదులు అందాయి. ఈ సమస్యను తీవ్రంగా పరిగణించిన ప్రభుత్వం 2008 జాతీయ రహదారి రుసుము నియమాలకు సవరణలు చేస్తూ అధికారిక నోటిఫికేషన్ విడుదల చేసింది.

ఇకపై ఏ ఎక్స్‌ప్రెస్‌వే అయినా పూర్తి స్థాయిలో సిద్ధం కాకపోతే దానిపై అదనపు భారం వేయకూడదని నిర్ణయించింది.

నూతన నిబంధనల ప్రకారం ఒక ఎక్స్‌ప్రెస్‌వే వంద శాతం పూర్తి కానట్లయితే ఆ మార్గంలో ప్రయాణించే వాహనదారుల నుండి కేవలం సాధారణ జాతీయ రహదారి రేట్ల ప్రకారమే టోల్ వసూలు చేస్తారు. అంటే ప్రస్తుతం వసూలు చేస్తున్న టోల్ మొత్తంలో దాదాపు 25 శాతం వరకు తగ్గింపు లభిస్తుంది.

ఈ నిర్ణయం వల్ల ఉత్తరప్రదేశ్, బీహార్, మహారాష్ట్ర వంటి రాష్ట్రాల్లో నిర్మాణంలో ఉన్న అనేక ఎక్స్‌ప్రెస్‌వేలపై ప్రయాణించే వారికి ఆర్థికంగా ఎంతో మేలు జరుగుతుంది. రోడ్ల నిర్మాణం సాగుతున్న సమయంలో కలిగే అసౌకర్యాన్ని పరిగణనలోకి తీసుకుని ఈ మినహాయింపు ఇవ్వడం జరిగింది.

ఎక్స్‌ప్రెస్‌వే పూర్తిగా నిర్మించబడి అన్ని వసతులు కల్పించిన తర్వాతే అధిక ధరలను వసూలు చేయడానికి అనుమతి ఉంటుంది.

ఈ సవరణ వల్ల దేశవ్యాప్తంగా రవాణా రంగంలో పారదర్శకత పెరుగుతుంది. వాహనదారులు తాము పొందుతున్న సౌకర్యాలకు తగ్గట్టుగా మాత్రమే రుసుము చెల్లించే అవకాశం ఏర్పడుతుంది. ప్రాజెక్టుల నిర్మాణంలో జరిగే జాప్యం వల్ల సామాన్య ప్రజలపై అదనపు భారం పడకుండా ప్రభుత్వం ఈ చర్యలు తీసుకుంది. అలాగే అసంపూర్ణ రహదారుల వద్ద టోల్ వసూళ్లపై వచ్చే వివాదాలకు ఈ నిర్ణయం ద్వారా స్వస్తి పలకవచ్చు.

రహదారి భద్రత, ప్రయాణ సౌలభ్యం మెరుగుపడినప్పుడే పూర్తి స్థాయి రుసుము వసూలు చేయాలనే నిబంధన పారిశ్రామిక రంగానికి సైతం లాభిస్తుంది. ఈ విధానపరమైన మార్పులు దేశ మౌలిక సదుపాయాల అభివృద్ధిలో ప్రజల భాగస్వామ్యాన్ని, విశ్వాసాన్ని మరింత పటిష్టం చేస్తాయి.

టోల్ వసూళ్లలో సామాన్యుడి ప్రయోజనాలే పరమావధిగా ప్రభుత్వం తీసుకున్న ఈ నిర్ణయం వాహనదారులకు నిజమైన శుభవార్తగా నిలుస్తుంది.

సి.హెచ్.ప్రతాప్