ప్రపంచంలోనే అత్యంత ఎత్తైన శివలింగం ఎక్కడ ఉందో తెలుసా…?

భారతదేశం ఆధ్యాత్మికతకు నిలయం. మన దేశంలో ఎన్నో పురాతనమైన విశిష్టమైన దేవాలయాలు ఉన్నాయి. వాటిలో కేరళ రాష్ట్రంలోని తిరువనంతపురం జిల్లా చెంకల్ గ్రామంలో వెలిసిన మహేశ్వరం శ్రీ శివపార్వతి దేవస్థానం అత్యంత ప్రాముఖ్యతను సంతరించుకుంది. ఈ క్షేత్రాన్ని దక్షిణ కైలాసం అని భక్తులు ఎంతో భక్తితో పిలుచుకుంటారు.

ఎనిమిది అంతస్తుల ఎత్తులో నిర్మాణం

ఈ ఆలయ ప్రత్యేకత ఏమిటంటే ఇక్కడ ప్రపంచంలోనే అత్యంత ఎత్తైన శివలింగం కొలువై ఉంది. దీని ఎత్తు 111.2 అడుగులు. ఈ అద్భుతమైన కట్టడం దేశ విదేశాలలోని అనేక రికార్డుల సంస్థల గుర్తింపు పొందింది.

ఈ శివలింగం కేవలం ఎత్తులోనే కాకుండా దాని నిర్మాణ శైలిలోనూ ఎంతో విశిష్టతను కలిగి ఉంది. దీని వెలుపలి వ్యాసం 30.44 అడుగులు కాగా లోపలి వ్యాసం 17.55 అడుగులుగా ఉంటుంది. ఈ లింగం ఎనిమిది అంతస్తుల నిర్మాణంతో కూడి ఉంటుంది.

భక్తులు ఈ శివలింగం లోపలికి వెళ్లి పై వరకు నడిచి వెళ్లే సౌకర్యం ఉండటం ఇక్కడి ప్రధాన ఆకర్షణ. ప్రతి అంతస్తులోనూ ధ్యానం చేసుకోవడానికి ప్రశాంతమైన వాతావరణం ఉంటుంది. లోపలి గోడలపై అందమైన శిల్పకళ ఆధ్యాత్మిక చిత్రాలు భక్తులను మంత్రముగ్ధులను చేస్తాయి. శివలింగం లోపలి మార్గం ద్వారా ప్రయాణిస్తూ చివరికి చేరుకున్నప్పుడు లభించే అనుభూతి వర్ణనాతీతం.

సున్నపురాయి ,  సిమెంటు వాడకుండానే

ఈ మహాలింగం నిర్మాణంలో ఎక్కడా సున్నపురాయి లేదా సిమెంటు వంటి ఆధునిక పదార్థాలను వాడలేదని కేవలం సాంప్రదాయ పద్ధతుల్లో ఔషధ గుణాలు కలిగిన మట్టి సహజ పదార్థాలను మాత్రమే ఉపయోగించారని చెబుతారు. దీనిని ఒక సతిక లింగంగా కూడా వ్యవహరిస్తారు. ఈ భారీ శివలింగం చుట్టూ ఎంతో ప్రశాంతమైన ప్రకృతి ఒడిలో దేవాలయం నిర్మించబడింది.

సృష్టి స్థితి లయ కారకుడైన పరమేశ్వరుని విశ్వరూపానికి ఈ కట్టడం ఒక ప్రతీకగా నిలుస్తుంది. భక్తుల కోర్కెలను తీర్చే కల్పవృక్షంగా జ్ఞానాన్ని ప్రసాదించే జ్యోతి స్వరూపంగా ఈ క్షేత్రం విరాజిల్లుతోంది. శివరాత్రి సమయంలో ఈ ఆలయం వేలమంది భక్తులతో కిక్కిరిసిపోతుంది.

భక్తులు ఇక్కడ లింగం లోపల ఉన్న ఎనిమిది అంతస్తుల ద్వారా ప్రయాణించేటప్పుడు మనిషి శరీరంలోని ఎనిమిది చక్రాలను ఉత్తేజితం చేసేలా ఈ నిర్మాణం సాగింది. ఆకాశాన్ని తాకుతున్నట్లుగా ఉండే ఈ శివలింగం ముందు నిలబడితే మనిషి ఎంత అల్పమో దైవశక్తి ఎంత అనంతమో స్పష్టంగా అర్థమవుతుంది. అహంకారాన్ని వీడి ఆ పరమశివుని శరణు వేడితే మోక్షం లభిస్తుందనే సందేశాన్ని ఈ మహాలింగం నిశ్శబ్దంగా చాటిచెబుతోంది.

నిర్మాణం పూర్తి కావడానికి పదేళ్ల సమయం

ఈ మహా నిర్మాణం పూర్తి కావడానికి దాదాపు పదేళ్ల సమయం పట్టింది. భక్తులు ఒకేసారి శివపార్వతుల అనుగ్రహాన్ని పొందేలా ఇక్కడ ఆలయ నిర్మాణం జరిగింది. ఈ క్షేత్రంలో కేవలం శివలింగమే కాకుండా దశావతార స్వరూపాలు అలాగే 108 రకాల శివలింగ రూపాలను కూడా భక్తులు దర్శించుకోవచ్చు. ఆలయ ప్రాంగణంలో ఉన్న ప్రతి అడుగు ఆధ్యాత్మికతను పంచుతుంది.

మనిషి తనలోని నెమ్మదిని కోల్పోయి పరుగులు తీస్తున్న ఈ కాలంలో ఇటువంటి ప్రదేశాలు మనసును ప్రశాంత పరచడానికి ఎంతో తోడ్పడతాయి. కేరళ రాష్ట్రపు సంస్కృతికి చిహ్నంగా నిలిచే ఈ ఆలయం ప్రపంచ పర్యాటక పటంలో ఒక ప్రత్యేక గుర్తింపు పొందింది. ఇక్కడి శివలింగం పైభాగం నుండి చూస్తే చుట్టుపక్కల ఉన్న పచ్చని ప్రకృతి దృశ్యాలు కనువిందు చేస్తాయి.

ఈ ప్రదేశం కేవలం యాత్రా స్థలం మాత్రమే కాకుండా ఒక గొప్ప శిల్పకళా క్షేత్రంగా కూడా వర్ధిల్లుతోంది. భారతీయ శిల్ప శాస్త్రంలోని మెళకువలను ఉపయోగించి నిర్మించిన ఈ మహాలింగం భవిష్యత్తు తరాలకు మన ఆధ్యాత్మిక వైభవాన్ని తెలియజేస్తుంది. ఇక్కడ ప్రతిరోజూ జరిగే ప్రత్యేక పూజలు అభిషేకాలు భక్తుల హృదయాలను భక్తిరసంలో ముంచెత్తుతాయి. సామాన్య మానవుడి నుంచి మేధావుల వరకు అందరినీ ఆశ్చర్యపరిచే ఈ అద్భుత నిర్మాణం దక్షిణ భారతదేశంలోనే ఒక గొప్ప ఆకర్షణగా నిలిచింది.

పరమేశ్వరుడు స్వయంగా వెలిశాడన్న భావనతో

పరమేశ్వరుడు స్వయంగా ఇక్కడ వెలిశాడన్న భావన భక్తులకు కలుగుతుంది. నిర్మలమైన హృదయంతో ఈ క్షేత్రాన్ని దర్శించిన వారికి సకల శుభాలు కలుగుతాయని ఇక్కడి వారు విశ్వసిస్తారు. ధర్మ స్థాపన కోసం భక్తి మార్గాన్ని ప్రోత్సహించడానికి ఇటువంటి పుణ్యక్షేత్రాలు ఎంతో అవసరం.

లింగోద్భవ కాలంలో ఈ ఆలయం చుట్టూ దీపాలు వెలిగించినప్పుడు ఆ దృశ్యం కైలాసాన్ని తలపిస్తుంది. ఆ దివ్యమైన కాంతిలో శివలింగం ధగధగలాడుతూ కనిపిస్తుంది. ఈ మహిమాన్వితమైన క్షేత్రాన్ని దర్శించడం ప్రతి శివ భక్తుని జీవిత కాల స్వప్నంగా మారుతోంది. ఈ విధంగా మహేశ్వరం క్షేత్రం తనదైన శైలిలో భక్తులను ఆకట్టుకుంటూ ఆధ్యాత్మిక పరిమళాలను వెదజల్లుతోంది.

(సి.హెచ్.ప్రతాప్)
మొబైల్ నెంబర్: 98808 51898