21 యూనిట్లకు రూ.11.75 కోట్ల సబ్సిడీని మంజూరు
కరీంనగర్ : జిల్లాలో టీఎస్-ఐపాస్ కింద దరఖాస్తు చేసుకున్న 21 యూనిట్లకు రూ.11.75 కోట్ల సబ్సిడీని మంజూరు చేసినట్లు జిల్లా కలెక్టర్ ఆర్వీ కర్ణన్ తెలియజేశారు.
జిల్లా పారిశ్రామిక ప్రోత్సాహక కమిటీ సమావేశం శుక్రవారం కళాశాలలో జరిగింది. ఈ సందర్భంగా ఆయన మాట్లాడుతూ.. పారిశ్రామికవేత్తలను ప్రోత్సహించేందుకు లబ్ధిదారులకు 21 యూనిట్లు మంజూరు చేశామన్నారు. సమావేశంలో రూ.11.75 కోట్ల మంజూరుకు ఆమోదం తెలిపి నిధుల విడుదలకు ప్రభుత్వానికి ప్రతిపాదనలు పంపారు.
21 యూనిట్లలో 10 గ్రానైట్ కటింగ్ యూనిట్లు, రెండు సీడ్ ప్రాసెసింగ్ యూనిట్లు, ఒక స్టోన్ క్రషర్ యూనిట్, నాలుగు జనరల్ ఇంజనీరింగ్ యూనిట్లు, మూడు ఫుడ్ ప్రాసెసింగ్ యూనిట్లు, ఒక మినరల్ వాటర్ ప్లాంట్ యూనిట్ ఉంటాయి.
ఈ యూనిట్ల ద్వారా 247 మంది నిరుద్యోగ యువతకు ఉపాధి అవకాశాలు లభిస్తాయని కలెక్టర్ తెలిపారు. టి-ప్రైడ్ (తెలంగాణ స్టేట్ ప్రోగ్రాం ఫర్ ర్యాపిడ్ ఇంక్యుబేషన్ ఆఫ్ దళిత్ ఎంట్రప్రెన్యూర్స్) పథకం కింద ముగ్గురు లబ్ధిదారులకు 3 ట్రాక్టర్లు కొనుగోలు చేసేందుకు రూ.9.05 లక్షల సబ్సిడీని మంజూరు చేసినట్లు తెలిపారు. సమావేశంలో జిల్లా పరిశ్రమల కేంద్రం జనరల్ మేనేజర్‌ నవీన్‌కుమార్‌, వెహికల్‌ ఇన్‌స్పెక్టర్‌ నాగలక్ష్మి, ఎన్‌పీడీసీఎల్‌ డీఈ శ్రీనివాస్‌, ఎల్‌డీఎం లక్ష్మణ్‌, కాలుష్య నివారణ మండలి ఏఈ సుభాష్‌, డీటీపీఓ ఆంజనేయులు, స్టేట్ ఫైనాన్స్‌ కార్పొరేషన్‌ అసిస్టెంట్‌ మేనేజర్‌ చంద్ర వికాస్‌, ఇండస్ట్రియల్‌ ప్రమోషన్‌ అధికారిణి మధులత తదితరులు పాల్గొన్నారు.